តាមការរាយការណ៍របស់កាសែត South China Morning Post ក្រុមហ៊ុន Seven & i Holdings បានចេញសេចក្តីថ្លែងការណ៍នៅថ្ងៃច័ន្ទនេះថា លោក Suzuki ជាអតីតប្រធានក្រុមហ៊ុន បានទទួលមរណភាពកាលពីថ្ងៃទី ១៨ ខែឧសភា ក្នុងជន្មាយុ ៩៣ ឆ្នាំ ដោយជំងឺខ្សោយបេះដូង។ នៅក្នុងសេចក្តីថ្លែងការណ៍នោះ ក្រុមហ៊ុនបានបន្ថែមថា ៖ « យើងខ្ញុំសូមថ្លែងអំណរគុណយ៉ាងជ្រាលជ្រៅចំពោះសេចក្តីសប្បុរសដែលបានបង្ហាញចំពោះលោកក្នុងមួយជីវិតរបស់លោក និងសូមគោរពជម្រាបដំណឹងមរណភាពរបស់លោក » ។

កាសែត New York Times បានរាយការណ៍ថា លោក Suzuki បានចំណាយពេលជាង ៤០ ឆ្នាំក្នុងការកសាងបណ្តាញហាងងាយស្រួល 7-Eleven ឲ្យក្លាយជាគ្រឹះដ៏សំខាន់មួយនៃជីវិតប្រចាំថ្ងៃនៅប្រទេសជប៉ុន។ ដោយឡែក កាសែត The Japan Times បានឲ្យដឹងថា លោក Suzuki ដែលជាបុគ្គលដែលគេស្គាល់ច្បាស់ថាជាអ្នកនាំយកហាង 7-Eleven ចូលមកកាន់ទីផ្សារជប៉ុន ថ្មីៗនេះបានបម្រើការជាទីប្រឹក្សាកិត្តិយសរបស់ក្រុមហ៊ុន Seven & i Holdings ។

សារព័ត៌មាន South China Morning Post បានកត់សម្គាល់ថា លោក Suzuki ត្រូវបានគេហៅថាជា « បិតានៃហាងងាយស្រួល » (father of the convenience store) នៅក្នុងស្រុកកំណើតរបស់គាត់ ដោយសារតែភាពជោគជ័យយ៉ាងធំធេងជាសកលរបស់ 7-Eleven ដែលត្រូវបានផ្តល់កិត្តិយសចំពោះគាត់។ មុនពេលទទួលមរណភាព លោកបានធ្វើជាប្រធានក្រុមហ៊ុន Seven & i Holdings អស់រយៈពេលជាច្រើនឆ្នាំ និងដឹកនាំការពង្រីកខ្សែសង្វាក់ហាងនេះទៅកាន់តំបន់ជាច្រើននៅជុំវិញពិភពលោក។