សិស្ស ៨ នាក់ចាប់ខ្លួនក្រោយអគ្គិភ័យសាលាសម្លាប់ ១៦ នាក់

នៅថ្ងៃសុក្រ ទី ២៩ ខែឧសភា ឆ្នាំ ២០២៦ សារព័ត៌មាន BBC និង Sky News បានរាយការណ៍ថា អគ្គិភ័យមួយបានឆាបឆេះនៅក្នុងបន្ទប់ដេកនៃសាលាបណ្ដុះបណ្ដាលក្មេងស្រីមួយ ក្នុងប្រទេសកេនយ៉ា កាលពីយប់ថ្ងៃព្រហស្បតិ៍ ទី ២៨ ខែឧសភា។ ខណៈដែលសិស្សកំពុងដេកលក់ អគ្គិភ័យបានឆាបឆេះយ៉ាងសន្ធោសន្ធៅ បណ្ដាលឱ្យសិស្សចំនួន ១៦ នាក់បាត់បង់ជីវិត។

Sky News និងកាសែត New York Times បានរាយការណ៍បន្ថែមថា ប៉ូលីសកេនយ៉ាបានចាប់ខ្លួនសិស្ស ៨ នាក់ ដែលសុទ្ធតែជាសិស្សរៀននៅសាលាកើតហេតុ ក្រោមការសង្ស័យពីបទដុតអគ្គិភ័យដោយចេតនា។ សិស្សទាំង ៨ នាក់នេះកំពុងស្ថិតក្នុងការឃាត់ខ្លួនរបស់ប៉ូលីស។

កាសែត New York Times បានគូសបញ្ជាក់ទៀតថា សាលាដែលកើតហេតុគឺជាសាលាគ្រប់គ្រងនិងដំណើរការដោយកងកម្លាំងប៉ូលីសកេនយ៉ា។ រដ្ឋមន្ត្រីក្រសួងអប់រំកេនយ៉ាបានមានប្រសាសន៍ថា សិស្សទាំង ៨ នាក់អាចនឹងត្រូវបានដាក់ចោទប្រកាន់ជាផ្លូវការនៅក្នុងអំឡុងសប្តាហ៍ក្រោយនេះ។ រហូតមកដល់ពេលនេះ មិនទាន់មានសេចក្តីថ្លែងការណ៍ណាមួយពីប៉ូលីសអំពីមូលហេតុនៃការដុតនោះទេ ហើយការស៊ើបអង្កេតនៅតែបន្ត។