Bloomberg បានរាយការណ៍កាលពីថ្ងៃពុធ ទី៣ មិថុនា ឆ្នាំ២០២៦ ដោយដកស្រង់សម្តីប្រភពជិតស្និទ្ធនឹងរឿងនេះថា សមាជិកមួយចំនួននៃគ្រួសារ Glazer ដែលជាមហាសេដ្ឋីអាមេរិក បាននិងកំពុងពិចារណាពីលទ្ធភាពលក់ភាគហ៊ុនដែលពួកគេកាន់កាប់នៅក្នុងក្រុមហ៊ុនក្លឹបបាល់ទាត់ Manchester United FC ។

ព័ត៌មាននេះត្រូវបានចុះផ្សាយបន្តដោយ Channel News Asia និង New Straits Times ផងដែរ។ New Straits Times បានចុះផ្សាយពីទីក្រុងម៉ិកស៊ិកូ ដោយដកស្រង់ថា សមាជិកគ្រួសារ Glazer មួយចំនួនបានជជែកគ្នាអំពីការលក់ភាគហ៊ុននេះ។

តាមការរាយការណ៍របស់ Bloomberg គ្រួសារ Glazer បានធ្វើជាម្ចាស់ក្រុម Manchester United អស់រយៈពេលជាង ២០ ឆ្នាំមកហើយ ប៉ុន្តែការកាន់កាប់នេះបានទទួលរងការតវ៉ាជារឿយៗពីអ្នកគាំទ្រក្រុមនេះ ដោយពួកគេមិនពេញចិត្តនឹងរបៀបគ្រប់គ្រងរបស់គ្រួសារអាមេរិកមួយនេះ។

Bloomberg បានបញ្ជាក់ថា ការពិភាក្សាអំពីការលក់ភាគហ៊ុននេះ ធ្វើឡើងតែក្នុងចំណោមសមាជិកមួយចំនួនតូចប៉ុណ្ណោះ មិនមែនគ្រួសារទាំងមូលឡើយ ហើយពុំទាន់មានការសម្រេចចិត្តចុងក្រោយណាមួយនៅឡើយទេ។