កាលពីថ្ងៃចន្ទ ទី ៨ មិថុនា ឆ្នាំ ២០២៦ អង្គការសិទ្ធិមនុស្ស Amnesty International បានចេញរបាយការណ៍មួយដែលត្រូវបានរាយការណ៍ដោយកាសែត Bangkok Post និង The Straits Times ថា មជ្ឈមណ្ឌលឆបោកតាមអ៊ីនធឺណិតជាច្រើននៅក្នុងប្រទេសកម្ពុជានៅតែបន្តដំណើរការ ទោះបីជាមានប្រតិបត្តិការបង្ក្រាបរយៈពេលជាច្រើនខែក៏ដោយ។ របាយការណ៍ដែលមានប្រវែង ១៧៦ ទំព័របានបញ្ជាក់ថា ក្នុងចំណោម ៨៦ ទីតាំងដែលត្រូវបានកំណត់អត្តសញ្ញាណថាជាមជ្ឈមណ្ឌលឆបោក រដ្ឋាភិបាលកម្ពុជាបានធ្វើអន្តរាគមន៍ត្រឹមតែ ២៤ កន្លែងប៉ុណ្ណោះ។

កាសែត Khmer Times បានរាយការណ៍កាលពីថ្ងៃអង្គារ ទី ៩ មិថុនាថា កម្ពុជាបានបដិសេធសេចក្តីថ្លែងការណ៍របស់ Amnesty International ដោយចាត់ទុកថាការវាយតម្លៃនេះមិនត្រឹមត្រូវ និងខ្វះបរិបទ។

ទន្ទឹមនេះ កាសែត Khaosod English របស់ថៃបានរាយការណ៍កាលពីថ្ងៃអង្គារ ទី ៩ មិថុនាថា កាលពីខែកក្កដា ឆ្នាំ ២០២៥ រដ្ឋាភិបាលកម្ពុជាក្រោមការដឹកនាំរបស់សម្តេចតេជោ ហ៊ុន ម៉ាណែត បានចេញបញ្ជាដល់មន្ត្រីពាក់ព័ន្ធឱ្យអនុវត្តការបង្ក្រាបមជ្ឈមណ្ឌលឆបោកយ៉ាងម៉ឺងម៉ាត់ ដោយព្រមានថាមន្ត្រីដែលមិនបានអនុវត្តតាមបញ្ជា ឬបដិសេធសហការ អាចនឹងត្រូវទទួលការត្រួតពិនិត្យលទ្ធផលការងារ ដែលអាចនាំឱ្យមានការផ្លាស់ប្តូរតំណែង ឬការបញ្ឈប់ការងារ។ ទោះជាយ៉ាងណា Khaosod បានលើកជាសំណួរថា តើមានមន្ត្រីណាម្នាក់ត្រូវបានទទួលខុសត្រូវដែរឬទេ?

ដោយឡែក ទីភ្នាក់ងារ AKP នៃរដ្ឋាភិបាលកម្ពុជា បានរាយការណ៍នៅថ្ងៃអង្គារ ទី ៩ មិថុនា ឆ្នាំ ២០២៦ ដោយដកស្រង់សម្តីមន្ត្រីម្នាក់ថា អាជ្ញាធររាជធានីភ្នំពេញបានត្រួតពិនិត្យទីតាំងសង្ស័យចំនួន ៨៥ កន្លែង និងបានរកឃើញប្រតិបត្តិការឆបោកតាមអ៊ីនធឺណិតមួយ និងរណ្តៅល្បែងស៊ីសងខុសច្បាប់មួយ។ មន្ត្រីដដែលបានបញ្ជាក់ថា ជនបរទេសមួយចំនួនត្រូវបានឃាត់ខ្លួនក្នុងប្រតិបត្តិការនេះ។ សកម្មភាពនេះជាផ្នែកមួយនៃកិច្ចខិតខំប្រឹងប្រែងបន្តរបស់អាជ្ញាធរកម្ពុជាក្នុងការបង្ក្រាបឧក្រិដ្ឋកម្មតាមប្រព័ន្ធអ៊ីនធឺណិត។