កាលពីថ្ងៃអង្គារ ទី ៧ កក្កដា ឆ្នាំ ២០២៦ កាសែត The Guardian បានចុះផ្សាយរបាយការណ៍មួយ ដោយដកស្រង់ទិន្នន័យពី ABC News ដែលបញ្ជាក់ថា មន្ទីរសុខាភិបាលរដ្ឋមីឈីហ្គែនបានកត់ត្រាករណីឆ្លងជំងឺដោយប៉ារ៉ាស៊ីត Cyclospora ជិត ៧០០ ករណី គិតត្រឹមថ្ងៃចន្ទ ទី ៦ កក្កដា។ តួលេខនេះគឺជាការកើនឡើងពី ១៧០ ករណីក្នុងរយៈពេលតែ ៦ ថ្ងៃប៉ុណ្ណោះ ដែលត្រូវបានមន្ត្រីសុខាភិបាលហៅថាជាកំណើន«អិចស្ប៉ូណង់ស្យែល» (exponential) និងជាការផ្ទុះជំងឺដ៏ធំខុសពីធម្មតា។

យោងតាមកាសែត The Guardian មធ្យមភាគប្រចាំឆ្នាំរបស់រដ្ឋមីឈីហ្គែនមានត្រឹមតែ ៥០ ករណីប៉ុណ្ណោះ ដែលមានន័យថាការកើនឡើងពេលនេះគឺខ្ពស់ជាងរហូត ១៤ ដង។ មន្ត្រីបានពណ៌នាថា នេះជាការផ្ទុះជំងឺដ៏ធំខុសពីធម្មតាសម្រាប់រដ្ឋមួយនេះ។

គេហទំព័រ The Hill បានបោះផ្សាយអត្ថបទមួយដាច់ដោយឡែក ដោយរាយការណ៍ថា ជំងឺប៉ារ៉ាស៊ីតនេះភាគច្រើនត្រូវបានរកឃើញប្រភពពីអាហារវេចខ្ចប់ស្រាប់ និងផលិតផលកសិកម្មស្រស់ៗ ដូចជា បន្លែ និងផ្លែឈើជាដើម។ ចំពោះអាការៈវិញ គឺបណ្តាលឲ្យរាករូសបែប«ផ្ទុះ» (explosive) ចេញជាទឹកយ៉ាងខ្លាំង ធ្វើឲ្យអ្នកជំងឺប្រឈមនឹងការបាត់បង់ជាតិទឹកធ្ងន់ធ្ងរ និងអាចតម្រូវឲ្យសម្រាកពេទ្យ។

The Guardian ក៏បានកត់សម្គាល់ទៀតថា ការកើនឡើងនេះមិនមែនមានតែនៅរដ្ឋមីឈីហ្គែនប៉ុណ្ណោះទេ ប៉ុន្តែរដ្ឋជាច្រើនទៀតនៅទូទាំងសហរដ្ឋអាមេរិកក៏កំពុងរាយការណ៍ពីករណីកើនឡើងគួរឲ្យព្រួយបារម្ភនេះផងដែរ។ ស្ថានការណ៍នេះបានជំរុញឲ្យមន្ត្រីសុខាភិបាលថ្នាក់ជាតិ និងថ្នាក់មូលដ្ឋានប្រមូលផ្តុំធនធានដើម្បីរកឲ្យឃើញពីប្រភពនៃការចម្លងជាបន្ទាន់។

បច្ចុប្បន្ននេះ ការស៊ើបអង្កេតកំពុងផ្តោតសំខាន់ទៅលើអាហារដែលសង្ស័យ ហើយមន្ត្រីរំពឹងថាចំនួនអ្នកជំងឺអាចនឹងបន្តកើនឡើងទៀតនៅថ្ងៃខាងមុខ ខណៈការស្រាវជ្រាវរកមូលហេតុនៅតែបន្ត។