តាមការរាយការណ៍របស់ BBC ប្រាក់ខែប្រចាំឆ្នាំរបស់នាយករដ្ឋមន្រ្តីសិង្ហបុរី លោក Lawrence Wong នឹងកើនឡើងដល់ ៣,៦ លានដុល្លារសិង្ហបុរី ស្មើនឹងប្រមាណ ២,៨ លានដុល្លារអាមេរិក។ Nokor Wat News បានរាយការណ៍ដោយដកស្រង់ទីភ្នាក់ងារសារព័ត៌មាន Reuters ថា លោក Wong បានថ្លែងទៅកាន់សភាកាលពីថ្ងៃអង្គារ ទី៨ ខែកញ្ញា ឆ្នាំ២០២៦ ថា រដ្ឋាភិបាលបានទទួលយកអនុសាសន៍របស់គណៈកម្មាធិការឯករាជ្យស្តីពីការដំឡើងប្រាក់ខែរដ្ឋមន្រ្តី ដោយប្រាក់ខែរបស់លោកផ្ទាល់នឹងត្រូវដំឡើងដល់ ៣,៦ លានដុល្លារសិង្ហបុរី ស្មើនឹង ២,៨៥ លានដុល្លារអាមេរិក។

South China Morning Post បានរាយការណ៍ថា រដ្ឋមន្រ្តីសិង្ហបុរីនឹងទទួលបានការដំឡើងប្រាក់ខែជាបណ្តើរៗ បន្ទាប់ពីកម្រិតប្រាក់ខែមូលដ្ឋានកើនឡើង ៦០ ភាគរយ ដោយកម្រិតចាប់ផ្តើមសម្រាប់រដ្ឋមន្រ្តីថ្មីនឹងកើនពី ១,១ លានដុល្លារសិង្ហបុរី ទៅ ១,៨ លានដុល្លារសិង្ហបុរី គឺប្រមាណ ១,៤ លានដុល្លារអាមេរិក ហើយកម្រិតប្រាក់ខែនាយករដ្ឋមន្រ្តីនឹងកើនពី ២,២ លានដុល្លារសិង្ហបុរី ទៅ ៣,៦ លានដុល្លារសិង្ហបុរី។ AsiaOne បានរាយការណ៍ថា រដ្ឋាភិបាលបានសម្រេចទទួលយកការដំឡើងប្រាក់ខែរដ្ឋមន្រ្តី ហើយនឹងធ្វើការកែសម្រួលប្រាក់ខែពិតប្រាកដមួយលើក ក្នុងអត្រារហូតដល់ ៩ ភាគរយ ដល់កម្រិត ១,២ លានដុល្លារ។

Nokor Wat News បានរាយការណ៍ដោយដកស្រង់គេហទំព័រ PoliticalSalaries.com ថា បើប្រៀបធៀបនឹងប្រាក់ខែរបស់លោក Wong ដែលរកបានជិត ៣ លានដុល្លារអាមេរិកក្នុងមួយឆ្នាំ នាយកប្រតិបត្តិទីក្រុងហុងកុងទទួលបានប្រាក់ខែ ៧១០ ០០០ ដុល្លារអាមេរិកក្នុងមួយឆ្នាំ ប្រធានាធិបតីស្វីសទទួលបាន ៦០៦ ០០០ ដុល្លារ នាយករដ្ឋមន្រ្តីចក្រភពអង់គ្លេសទទួលបាន ២៣០ ០០០ ដុល្លារ ហើយប្រធានាធិបតីអាមេរិក លោក ដូណាល់ ត្រាំ ទទួលបាន ៤០០ ០០០ ដុល្លារក្នុងមួយឆ្នាំ។

Financial Times បានរាយការណ៍ថា ការដំឡើងប្រាក់ខែរបស់នាយករដ្ឋមន្រ្តីសិង្ហបុរី ដែលខ្ពស់ជាងគេលើពិភពលោករួចស្រាប់ មានប្រមាណ ១ លានដុល្លារ ហើយការសម្រេចនេះកើតឡើងចំពេលដែលមានការមិនគាំទ្រពីសាធារណជន។ បន្ថែមលើនេះ Nokor Wat News បានរាយការណ៍ថា លោក Wong បានអះអាងថា សម្រាប់រយៈពេល ៥ ឆ្នាំខាងមុខ លោកនឹងបរិច្ចាគប្រាក់ទាំងអស់ដែលបានមកពីការដំឡើងប្រាក់ខែរបស់លោក។