នៅថ្ងៃទី៦ ខែឧសភា ឆ្នាំ២០២៦ សារព័ត៌មាន TechCrunch និង CNBC បានរាយការណ៍ថា ក្រុមហ៊ុនអវកាស SpaceX ដែលដឹកនាំដោយមហាសេដ្ឋីបច្ចេកវិទ្យាលោក Elon Musk កំពុងស្នើរសុំសាងសង់រោងចក្រផលិតឈីបមួយឈ្មោះ Terafab នៅក្នុងរដ្ឋតិចសាស់ សហរដ្ឋអាមេរិក។ យោងតាមឯកសារដែលដាក់ជូនអាជ្ញាធរមូលដ្ឋាន តួលេខទឹកប្រាក់វិនិយោគអាចឡើងដល់ ១១៩ ពាន់លានដុល្លារអាមេរិក ដែលជាចំនួនដ៏ធំបំផុតមួយមិនធ្លាប់មានសម្រាប់គម្រោងផលិតឈីប។

TechCrunch ដែលបានទទួលឯកសារសំណើនេះមុនគេ បានដកស្រង់ខ្លឹមសារពីសំណើរបស់ SpaceX ដោយពណ៌នាថា គម្រោង Terafab នឹងក្លាយជា «កន្លែងផលិតស៊ីមីកុងឌុចទ័រនិងការប្រមូលផ្តុំកុំព្យូទ័រជំនាន់ថ្មីដែលរួមបញ្ចូលគ្នាក្នុងដំណាក់កាលជាច្រើន» (ជាភាសាអង់គ្លេស៖ «multi-phase, next-generation, vertically integrated semiconductor manufacturing and advanced computing fabrication facility»)។ ឃ្លានេះបញ្ជាក់ថា រោងចក្រនេះនឹងរួមបញ្ចូលគ្រប់ដំណាក់កាលនៃការផលិតឈីបចាប់ពីការរចនា ការផលិតបន្ទះសៀគ្វី រហូតដល់ការដំឡើងចុងក្រោយ ដោយមិនចាំបាច់ពឹងផ្អែកលើដៃគូខាងក្រៅ។

រីឯ CNBC បានរាយការណ៍បន្ថែមថា ឈីបដែលផលិតបានពីរោងចក្រ Terafab មានគោលដៅសំខាន់សម្រាប់បំពាក់ដល់ក្រុមហ៊ុនចំនួនបីរបស់លោក Elon Musk គឺក្រុមហ៊ុន Tesla, SpaceX និង xAI។

ទោះជាយ៉ាងណា របាយការណ៍ទាំងពីរបានសង្កត់ធ្ងន់ថា តួលេខ ១១៩ ពាន់លានដុល្លារ គ្រាន់តែជាការប៉ាន់ស្មានអតិបរមាប៉ុណ្ណោះ ហើយការចំណាយជាក់ស្តែងអាចទាបជាងនេះ។ ឯកសារមិនបានបញ្ជាក់ថាតើគម្រោងនឹងចាប់ផ្តើមនៅពេលណា ឬថវិកានឹងមកពីប្រភពណាឡើយ។ រហូតមកដល់ពេលនេះ មិនទាន់មានការបញ្ជាក់ជាផ្លូវការណាមួយពី SpaceX ឬលោក Elon Musk អំពីព័ត៌មាននេះនៅឡើយទេ។