នៅថ្ងៃទី៩ ខែឧសភា ឆ្នាំ២០២៦ សារព័ត៌មាន Al Jazeera និង DW បានរាយការណ៍ថា វេទិកាអប់រំអនឡាញ Canvas ដែលត្រូវបានប្រើប្រាស់ដោយសិស្សនិស្សិតរាប់លាននាក់នៅទូទាំងពិភពលោក បានត្រឡប់មកដំណើរការវិញដោយផ្នែក បន្ទាប់ពីទទួលរងការវាយប្រហារតាមអ៊ីនធឺណិតពីក្រុម Hacker ដែលគេស្គាល់ថា ShinyHunters។
DW បានរាយការណ៍ថា មុនពេលការវាយប្រហារនេះកើតឡើង ក្រុម ShinyHunters បានព្យាយាមជំរិតយកប្រាក់ពីសាកលវិទ្យាល័យដែលជាអតិថិជនរបស់ Canvas។ បន្ទាប់ពីបំពានចូលប្រព័ន្ធ ក្រុមនេះបានគំរាមថានឹងលេចធ្លាយទិន្នន័យនិស្សិត ប្រសិនបើពួកគេមិនទទួលបានប្រាក់តាមការទាមទារ នេះបើយោងតាម Al Jazeera។
កាសែត The Straits Times ប្រចាំប្រទេសសិង្ហបុរី បានផ្សាយនៅថ្ងៃដដែលថា ការវាយប្រហារនេះបានជះឥទ្ធិពលដល់ថ្នាក់រៀននៅសហរដ្ឋអាមេរិក ហើយសាលារៀនមួយចំនួនបានទាក់ទងដោយផ្ទាល់ទៅកាន់ក្រុម ShinyHunters តាមប្រភពមួយ។
The Straits Times ក៏បានរៀបរាប់ដែរថា ShinyHunters ជាក្រុម Hacker ដែលមានកេរ្តិ៍ឈ្មោះក្នុងការធ្វើយុទ្ធនាការលួចទិន្នន័យ និងជំរិតប្រាក់ពីក្រុមហ៊ុនធំៗនៅទូទាំងពិភពលោក។ កាលពីអតីតកាល ក្រុមនេះធ្លាប់បានវាយប្រហារលើក្រុមហ៊ុនបច្ចេកវិទ្យា និងអ្នកផ្តល់សេវាធំៗ ហើយបណ្តាលឱ្យមានការលេចធ្លាយទិន្នន័យដ៏សំខាន់។
ទោះបីជាវេទិកា Canvas បានដំណើរការមួយផ្នែកឡើងវិញក៏ដោយ ក្រុមហ៊ុនគ្រប់គ្រងវេទិកាមិនទាន់ចេញមកបញ្ជាក់ជាសាធារណៈអំពីទំហំនៃការលេចធ្លាយទិន្នន័យ ឬថាតើមានព័ត៌មានសម្ងាត់របស់សិស្សពិតជាត្រូវបានលេចធ្លាយឬអត់នោះទេ។ របាយការណ៍ពី Al Jazeera បញ្ជាក់ថា ការស្ដារឡើងវិញនេះបានជួយឱ្យសិស្សរាប់លាននាក់អាចចូលប្រើវេទិកាសម្រាប់ការសិក្សាឡើងវិញបានមួយផ្នែក។