តាមការរាយការណ៍ពី BBC និងកាសែត The Guardian ប៉ូលិសនៅរដ្ឋតិចសាស់ សហរដ្ឋអាមេរិក បានធ្វើការចាប់ខ្លួនអ្នកបើកបររថយន្ត Tesla Cybertruck ម្នាក់ កាលពីថ្ងៃអង្គារ បន្ទាប់ពីរូបគាត់បានបើករថយន្តនេះចូលទៅក្នុងបឹង Grapevine នៅភាគខាងជើងនៃរដ្ឋតិចសាស់ ដោយចេតនា ដើម្បីសាកល្បងប្រើប្រាស់មុខងារពិសេសមួយរបស់រថយន្តដែលមានឈ្មោះថា 'Wade Mode' ។

នាយកដ្ឋានប៉ូលិស Grapevine បានប្រកាសនៅថ្ងៃអង្គារអំពីការស្រង់យករថយន្តនេះចេញពីផែដាក់ទូក Katie's Woods Park Boat Ramp និងការចាប់ខ្លួនអ្នកបើកបរ។ តាមការរាយការណ៍របស់ The Guardian ប៉ូលិសបាននិយាយថា "អ្នកបើកបរបានបញ្ជាក់ថាគាត់បានបើករថយន្តចូលក្នុងបឹងដោយចេតនាដើម្បីប្រើប្រាស់មុខងារ Wade Mode របស់ Cybertruck"។

យោងតាមរបាយការណ៍របស់ BBC និង The Guardian ភ្លាមៗក្រោយពេលដែលរថយន្ត Cybertruck នេះបើកចូលទៅក្នុងបឹង Grapevine វាបានខូចមុខងារ ហើយទឹកបឹងក៏ចាប់ផ្ដើមហូរចូលទៅក្នុងរថយន្ត។ ស្ថានភាពនេះបានបង្ខំឱ្យអ្នកបើកបរ និងអ្នកដំណើរដទៃទៀតដែលនៅក្នុងរថយន្ត ត្រូវតែបោះបង់រថយន្តចោល ហើយប្រញាប់ហៅទូរស័ព្ទសុំជំនួយពីសមត្ថកិច្ច។

The Guardian បានបន្ថែមថា រថយន្តនេះបានក្លាយទៅជាមិនអាចដំណើរការបានទៀត ហើយត្រូវបានទុកចោលនៅក្នុងទឹកបឹងរហូតដល់ក្រុមជួយសង្គ្រោះមកដល់។

BBC ក៏បានផ្សាយវីដេអូមួយបង្ហាញពីហេតុការណ៍នេះ ដោយរាយការណ៍ថា ក្រុមជួយសង្គ្រោះបានស្រង់យករថយន្តនេះចេញពីទឹកនៅក្បែរច្រាំងបឹង ហើយប៉ូលិសបានចាប់ខ្លួនអ្នកបើកបរដែលកំពុងព្យាយាមប្រើប្រាស់មុខងារ Wade Mode ។