កាលពីថ្ងៃទី២០ ឧសភា ឆ្នាំ២០២៦ ទីភ្នាក់ងារព័ត៌មាន Bloomberg បានរាយការណ៍ថា ប្រទេសសិង្ហបុរីបានវ៉ាដាច់ប្រទេសឥណ្ឌូនេស៊ីដើម្បីក្លាយជាប្រទេសដែលមានទីផ្សារភាគហ៊ុនធំជាងគេនៅតំបន់អាស៊ីអាគ្នេយ៍។ យោងតាមទិន្នន័យដែលចងក្រងដោយ Bloomberg និងត្រូវបានដកស្រង់ដោយកាសែត South China Morning Post ទំហំទីផ្សារសរុប (Market Capitalisation) របស់ក្រុមហ៊ុនដែលបានចុះបញ្ជីនៅក្នុងប្រទេសឥណ្ឌូនេស៊ីបានធ្លាក់ចុះមកនៅត្រឹម ៦១៨ ពាន់លានដុល្លារអាមេរិក ដែលជាការថយចុះយ៉ាងខ្លាំងបើធៀបនឹងទីផ្សារសិង្ហបុរីដែលមានទំហំដល់ទៅ ៦៤៥ ពាន់លានដុល្លារអាមេរិក។

កាសែត South China Morning Post បានគូសបញ្ជាក់នៅក្នុងរបាយការណ៍ដាច់ដោយឡែករបស់ខ្លួនថា ទីផ្សារភាគហ៊ុនឥណ្ឌូនេស៊ីបានធ្លាក់ចុះក្នុងអត្រាជាង ៣០ ភាគរយ ធៀបនឹងចំណុចកំពូលដែលខ្លួនសម្រេចបានកាលពីខែមករា ឆ្នាំ២០២៦។ ការធ្លាក់ចុះនេះបានធ្វើឱ្យតម្លៃទីផ្សារសរុបរបស់ឥណ្ឌូនេស៊ីធ្លាក់ចុះមកក្រោមកម្រិតរបស់សិង្ហបុរី ដែលបណ្ដាលឱ្យមានការផ្លាស់ប្ដូរចំណាត់ថ្នាក់ជាលើកដំបូងក្នុងរយៈពេលប៉ុន្មានឆ្នាំចុងក្រោយនេះ។

ក្នុងការវិភាគអំពីមូលហេតុនៅពីក្រោយការផ្លាស់ប្ដូរនេះ ទីភ្នាក់ងារ Bloomberg បានលើកឡើងថា វាជាសញ្ញានៃការគាំទ្ររបស់វិនិយោគិនអន្តរជាតិចំពោះកំណែទម្រង់ទីផ្សារដែលរដ្ឋាភិបាលសិង្ហបុរីបានដាក់ចេញ ហើយក៏ជាសញ្ញានៃការធ្លាក់ចុះទំនុកចិត្តរបស់វិនិយោគិនមកលើដំណើរការគ្រប់គ្រងសេដ្ឋកិច្ចរបស់រដ្ឋាភិបាលឥណ្ឌូនេស៊ីផងដែរ។

ស្របពេលជាមួយគ្នានេះ កាសែត South China Morning Post បានរាយការណ៍ថា មនោសញ្ចេតនារបស់វិនិយោគិនក្នុងប្រទេសឥណ្ឌូនេស៊ីបានធ្លាក់ចុះយ៉ាងគំហុកក្នុងអំឡុងប៉ុន្មានខែថ្មីៗនេះ ដោយសារតែភាពមិនច្បាស់ការនិងភាពមិនប្រាកដប្រជាជុំវិញបញ្ហានានាក្នុងវិស័យភាគហ៊ុន ដែលអាចនឹងបង្កជាហានិភ័យដល់កំណើនទីផ្សារ។

ថែមពីលើនេះ SCMP បានកត់សម្គាល់ថា ប្រទេសឥណ្ឌូនេស៊ីកំពុងជួបប្រទះនូវព្រឹត្តិការណ៍មិនល្អជាបន្តបន្ទាប់ ហើយការបាត់បង់ឋានៈជាទីផ្សារភាគហ៊ុនធំបំផុតនៅអាស៊ីអាគ្នេយ៍នេះ គឺជាសមិទ្ធផលអវិជ្ជមានថ្មីបំផុត ដែលឆ្លុះបញ្ចាំងពីបញ្ហាប្រឈមជាច្រើនរបស់សេដ្ឋកិច្ចឥណ្ឌូនេស៊ីនាពេលបច្ចុប្បន្ន។