សារព័ត៌មាន Channel News Asia និងទីភ្នាក់ងារព័ត៌មាន Bloomberg បានរាយការណ៍កាលពីថ្ងៃទី ៨ មិថុនា ឆ្នាំ ២០២៦ ដោយដកស្រង់ចេញពីរបាយការណ៍របស់សារព័ត៌មានបច្ចេកវិទ្យា The Information ថា ក្រុមហ៊ុន Alphabet ដែលជាម្ចាស់របស់ Google និងជាក្រុមហ៊ុនបច្ចេកវិទ្យាយក្សរបស់សហរដ្ឋអាមេរិក បានធ្វើការសម្រេចចិត្តជ្រើសរើសក្រុមហ៊ុន Intel ដែលជាក្រុមហ៊ុនផលិតបន្ទះឈីបធំជាងគេមួយ ដើម្បីផលិតបន្ទះឈីបឯកទេសសម្រាប់បញ្ញាសិប្បនិម្មិត (AI) ចំនួនច្រើនជាង ៣ លានគ្រឿង ។

តាមរយៈចំណងជើងនៃរបាយការណ៍របស់ Channel News Asia បន្ទះឈីបទាំងនេះគឺជាបន្ទះឈីប "in-house" ដែលមានន័យថាពួកវាត្រូវបានរចនាឡើងដោយក្រុមវិស្វកររបស់ Google ផ្ទាល់ ដើម្បីបំពេញតម្រូវការជាក់លាក់របស់ក្រុមហ៊ុន ខុសពីបន្ទះឈីបដែលមានលក់នៅលើទីផ្សារទូទៅ ។ ការផលិតនេះត្រូវបានគ្រោងសម្រាប់ឆ្នាំ ២០២៨ ហើយ Intel នឹងប្រើប្រាស់សមត្ថភាពផលិតរបស់ខ្លួន ។

ដោយឡែក Bloomberg បានរាយការណ៍ថា ភាគហ៊ុនរបស់ Intel បានកើនឡើងខ្ពស់បំផុតក្នុងរយៈពេលមួយខែ ក្រោយពីការចុះផ្សាយរបាយការណ៍នេះ។

មកទល់ពេលនេះ ព័ត៌មានលម្អិតអំពីតម្លៃនៃកិច្ចសន្យា ឬលក្ខខណ្ឌផ្សេងៗ មិនទាន់ត្រូវបានបង្ហាញឱ្យដឹងជាសាធារណៈនៅឡើយទេ។