FIFA បានសម្រេចចិត្តបង់ប្រាក់ឈ្នួលពេញថ្លៃទៅឱ្យអាជ្ញាកណ្តាលសញ្ជាតិសូម៉ាលី លោក Omar Abdulkadir Artan បន្ទាប់ពីរូបគេត្រូវបានអាជ្ញាធរសហរដ្ឋអាមេរិកបដិសេធការចូលទឹកដីសម្រាប់ការចូលរួមធ្វើជាអាជ្ញាកណ្តាលក្នុងព្រឹត្តិការណ៍ FIFA World Cup 2026 ដែលកំពុងប្រព្រឹត្តទៅនៅសហរដ្ឋអាមេរិក។ តាមការរាយការណ៍របស់សារព័ត៌មាន BBC និង Channel News Asia លោក Artan បានធ្វើដំណើរមកដល់អាកាសយានដ្ឋានអន្តរជាតិ Miami ប៉ុន្តែត្រូវបានអាជ្ញាធរអន្តោប្រវេសន៍សហរដ្ឋអាមេរិកឃាត់ខ្លួន និងបដិសេធមិនឱ្យឆ្លងកាត់ច្រកចូលឡើយ។

សារព័ត៌មាន Khaosod របស់ប្រទេសថៃបានរាយការណ៍យ៉ាងលម្អិតថា លោក Artan បានធ្វើដំណើរទៅកាន់សហរដ្ឋអាមេរិកជាមួយនឹងលិខិតឆ្លងដែនការទូត និងទិដ្ឋាការប្រភេទចូលតែម្ដង (single-entry visa) ប៉ុន្តែនៅពេលមកដល់ គាត់ត្រូវបានមន្រ្តីសហរដ្ឋអាមេរិកនាំខ្លួនទៅសាកសួរអស់រយៈពេល ១១ ម៉ោងពេញ មុនពេលត្រូវបានបង្ខំឱ្យឡើងយន្តហោះត្រឡប់ទៅកាន់ទីក្រុង Istanbul ប្រទសតួកគីវិញភ្លាមៗ។

Khaosod បានបន្ថែមទៀតថា អាជ្ញាធរសហរដ្ឋអាមេរិកបានអះអាងជាមូលហេតុនៃការបដិសេធនេះថា ពួកគេសង្ស័យថាលោក Artan មានទំនាក់ទំនងជាមួយបុគ្គលម្នាក់ដែលត្រូវបានគេសង្ស័យថាជាសមាជិកនៃក្រុមសកម្មប្រយុទ្ធ Al Shabab ដែលជាក្រុមភេរវកម្មដែលសហរដ្ឋអាមេរិកចាត់ទុកជាគ្រោះថ្នាក់។ យ៉ាងណាមិញ អាជ្ញាកណ្តាលរូបនេះបានបដិសេធទាំងស្រុងចំពោះការអះអាងនេះ ដោយបញ្ជាក់ថាគាត់ពុំមានពាក់ព័ន្ធអ្វីឡើយ។

បន្ទាប់ពីត្រូវបានបញ្ជូនត្រឡប់ទៅកាន់ទីក្រុង Istanbul និងទទួលជំនួយពីមន្ត្រី FIFA នៅទីនោះ លោក Artan បានបន្តការធ្វើដំណើរដោយយន្តហោះទៅកាន់រដ្ឋធានី Mogadishu របស់ប្រទេសសូម៉ាលីវិញ ដោយសុវត្ថិភាព តាមរបាយការណ៍របស់ Khaosod ។

ទោះបីជាមានហេតុការណ៍មិននឹកស្មានដល់នេះក្តី ក៏ប្រភពព័ត៌មានដែលនិយាយជាមួយ BBC Sport បានបញ្ជាក់ថា FIFA នឹងនៅតែបង់ប្រាក់ឈ្នួលក្នុងអត្រាពេញឱ្យលោក Artan ដូចអាជ្ញាកណ្តាលផ្សេងទៀតដែលបានបំពេញភារៈក្នុងព្រឹត្តិការណ៍ World Cup 2026 នេះ។ ចំនួនទឹកប្រាក់ច្បាស់លាស់នឹងត្រូវបានសរុប និងប្រកាសក្រោយពេលការប្រកួត World Cup ត្រូវបានបញ្ចប់។ ដំណឹងនេះក៏ត្រូវបានរាយការណ៍ដោយសារព័ត៌មាន New Straits Times និង Fresh News របស់កម្ពុជាផងដែរ។

គួររំលឹកផងដែរថា តាមការរាយការណ៍របស់ Khaosod លោក Artan មិនមែនជាអាជ្ញាកណ្តាលធម្មតានោះទេ។ គាត់គឺជាម្ចាស់ពានរង្វាន់ CAF Men's Referee of the Year សម្រាប់ឆ្នាំ ២០២៥ ដែលផ្តល់ដោយសហព័ន្ធបាល់ទាត់អាហ្វ្រិក (CAF) ហើយថ្មីៗនេះក៏ត្រូវបានអញ្ជើញឱ្យទៅដឹកនាំការប្រកួត UEFA Super Cup ផងដែរ ដែលបង្ហាញពីកម្រិតជំនាញខ្ពស់របស់គាត់នៅលើឆាកអន្តរជាតិ។