យោងតាមសេចក្តីរាយការណ៍របស់ BBC, Dawn, The Guardian និង Al Jazeera បានឲ្យដឹងថា នៅយប់ថ្ងៃពុធ ទី ១០ មិថុនា ២០២៦ កុមារី ហានីយ៉ា អាម៉េដ (Hania Ahmed) អាយុ ៩ ឆ្នាំ ដែលមានសញ្ជាតិអូស្ត្រាលី ត្រូវបានប៉ូលិសប៉ាគីស្ថានបាញ់សម្លាប់ នៅទីក្រុងចាកវ៉ាល់ (Chakwal) ខេត្តពុនចាប (Punjab) ភាគខាងកើតប្រទេសប៉ាគីស្ថាន។

Dawn បានរាយការណ៍ដោយដកស្រង់សក្ខីកម្មពីឪពុករបស់នាង គឺលោក អាឌីល អាម៉េដ (Adil Ahmad) ថា គ្រួសារដែលមកពីទីក្រុង Perth ប្រទេសអូស្ត្រាលី ទើបធ្វើដំណើរមកពីទីក្រុងម៉ាកកា (Makkah) ហើយនៅម៉ោង ៩ យប់នោះ ពួកគេកំពុងធ្វើដំណើរតាមរថយន្តទៅកាន់ផ្ទះឪពុកម្ដាយក្មេកនៅទីក្រុងចាកវ៉ាល់។ ស្រាប់តែមានចោរប្រដាប់អាវុធ ២ នាក់ បានប្លន់យកទ្រព្យសម្បត្តិពីម្ដាយរបស់នាង ហើយភ្លាមៗនោះ សមត្ថកិច្ចក៏មកដល់។

តាមសក្ខីកម្មដដែល ការបាញ់ប្រហារគ្នាបានកើតឡើង ហើយប៉ូលិសបានយល់ច្រឡំថា ចោរកំពុងរត់គេចខ្លួនក្នុងរថយន្តរបស់ជនរងគ្រោះ ក៏បានបាញ់ជាច្រើនគ្រាប់ចូលទៅក្នុងរថយន្ត បណ្តាលឲ្យកុមារី ហានីយ៉ា ស្លាប់ និងឪពុកព្រមទាំងបងប្រុសអាយុ ១០ ឆ្នាំ រងរបួស។ ម្ដាយពុំបានរងរបួសឡើយ។

នាយឧត្តមសេនីយ៍បន្ថែមនៃនាយកដ្ឋានគ្រប់គ្រងឧក្រិដ្ឋកម្ម (CCD) លោក សូហែល ហ្សាហ្វើរ ឆាថា (Sohail Zafar Chatha) បានថ្លែងប្រាប់ Dawn ថា សកម្មភាពរបស់មន្ត្រីរូបនេះ គឺជាការងាកចេញយ៉ាងធ្ងន់ធ្ងរពីនីតិវិធីប្រតិបត្តិការស្ដង់ដារ (SOP) និងស្ដង់ដារច្បាប់ស្ដីពីការប្រើប្រាស់កម្លាំង។ លោកបន្តថា ភស្តុតាងកោសល្យវិច័យ រួមទាំងអាវុធ និងសំបកគ្រាប់ ត្រូវបានរក្សាទុក ហើយការស៊ើបអង្កេតមួយដោយមិនលម្អៀងកំពុងដំណើរការ។ ដោយឡែក South China Morning Post បានរាយការណ៍ថា មន្ត្រីប៉ូលិសរូបនោះត្រូវបានចាប់ខ្លួនតាំងពីក្រោយហេតុការណ៍មក។

The Guardian និង BBC បានរាយការណ៍ថា នាយករដ្ឋមន្ត្រីអូស្ត្រាលី លោក អាន់តូនី អាល់បានេស៊ី (Anthony Albanese) បានអំពាវនាវជាសាធារណៈឲ្យប្រទេសប៉ាគីស្ថានធ្វើការស៊ើបអង្កេតដោយតម្លាភាព និងទាមទារចម្លើយអំពីហេតុការណ៍នេះ។ ព្រឹត្តិការណ៍នេះបានទទួលការចាប់អារម្មណ៍ជាអន្តរជាតិ ដោយ Dawn ក៏បានរាយការណ៍ថា សារព័ត៌មានអូស្ត្រាលីដូចជា ABC, The Guardian, និង SBS បានផ្សាយដំណឹងនេះយ៉ាងទូលំទូលាយ។