យោងតាមការរាយការណ៍របស់ DW, Channel News Asia និង Bangkok Post នៅថ្ងៃព្រហស្បតិ៍ ក្មេងប្រុសនេះបានបើករថយន្តភីកចប់របស់ឪពុកម្តាយខ្លួន ដោយគ្មានការអនុញ្ញាត ហើយបានបាត់បង់ការគ្រប់គ្រង ទើបបុកចូលក្បួនព្រះសង្ឃដែលកំពុងដង្ហែរធុតង្គ នៅស្រុកមឿង ខេត្តមុកដាហានភាគឦសានប្រទេសថៃ។ ប៉ូលិសថៃបានបញ្ជាក់ថា ឧបទ្ទវហេតុនេះបណ្តាលឲ្យព្រះសង្ឃ ៨ អង្គស្លាប់ ដោយក្នុងនោះ ៥ អង្គស្លាប់នៅកន្លែងកើតហេតុ និង ៣ អង្គទៀតស្លាប់នៅមន្ទីរពេទ្យ។ អ្នករបួសជាង ១៤ នាក់ផ្សេងទៀត ត្រូវបានបញ្ជូនទៅមន្ទីរពេទ្យមួយចំនួនក្នុងតំបន់។

កាសែត Khaosod របស់ថៃ បានរាយការណ៍បន្ថែមថា ម្តាយរបស់ក្មេងប្រុសនោះបានដឹងថាកូនប្រុសខ្លួនបានលួចយករថយន្តម៉ាក Isuzu ចេញពីផ្ទះ ហើយនាងបានប្រញាប់ទូរសព្ទទៅលេខ ១៩១ ដើម្បីសុំឲ្យមន្ត្រីប៉ូលិសជួយស្ទាក់ចាប់ ប៉ុន្តែមិនទាន់ពេលវេលាឡើយ រថយន្តបានរេចង្កូតនិងបុកចូលក្បួនព្រះសង្ឃ។ ទន្ទឹមនឹងនោះ សមត្ថកិច្ចបានឲ្យដឹងថា ក្មេងប្រុសស្ថិតក្នុងសភាពតក់ស្លុត ហើយមិនអាចផ្តល់សក្ខីកម្មបាននៅឡើយ។ ប៉ូលិសកំពុងបន្តការស៊ើបអង្កេត ដើម្បីរកមូលហេតុពិតប្រាកដនៃឧបទ្ទវហេតុនេះ រួមទាំងការពិនិត្យបញ្ហាមេកានិចនិងកត្តាអ្នកបើកបរ។

តាមការរាយការណ៍របស់ Channel News Asia ក្បួនព្រះសង្ឃដែលកំពុងដង្ហែរធុតង្គនេះ មានព្រះសង្ឃ ៣៥ អង្គ និងឧបាសក ៥ នាក់ ខណៈ Khaosod រាយការណ៍ថាមានព្រះសង្ឃ ៣៤ អង្គ។ ព្រះសង្ឃ ៥ អង្គបានស្លាប់ភ្លាមៗនៅកន្លែងកើតហេតុ ខណៈ ៣ អង្គទៀតបានស្លាប់នៅមន្ទីរពេទ្យក្រោយពីរងរបួសធ្ងន់។ អ្នករបួស ១៤ នាក់ផ្សេងទៀតកំពុងសម្រាកព្យាបាលនៅមន្ទីរពេទ្យក្នុងតំបន់។ ឧបទ្ទវហេតុនេះបានធ្វើឲ្យសហគមន៍ពុទ្ធសាសនិកក្នុងតំបន់មានការសោកស្ដាយយ៉ាងខ្លាំង។