ភ្នំពេញ ៖ តាម ការ រាយការណ៍ របស់ សារព័ត៌មាន ក្នុងស្រុក មួយចំនួន រួមមាន ភ្នំពេញប៉ុស្តិ៍, DAP News និង Nokor Wat News កង កម្លាំង ប្រដាប់អាវុធ ថៃ បាន ដាក់ របង លួសបន្លា នៅ តំបន់ មុំបី ក្នុង ខេត្ត ព្រះវិហារ និង តំបន់ ជប់រុន ស្រុក ត្រពាំងប្រាសាទ ខេត្ត ឧត្តរមានជ័យ កាលពី ថ្ងៃ ទី ២ ខែ កក្កដា ឆ្នាំ ២០២៦ ។ នៅ ថ្ងៃ ទី ៣ ខែ កក្កដា ក្រសួង ការបរទេស និង សហប្រតិបត្តិការ អន្តរជាតិ នៃ ព្រះរាជាណាចក្រ កម្ពុជា បាន ចេញ សេចក្តី ថ្លែង ការណ៍ តវ៉ា ជា ផ្លូវការ ដោយ បញ្ជាក់ ថា សកម្មភាព នេះ គឺ ជា ការ រំលោភ បំពាន យ៉ាង ធ្ងន់ធ្ងរ លើ អធិបតេយ្យភាព និង បូរណភាព ទឹកដី របស់ កម្ពុជា ។

ក្នុង សេចក្តី ថ្លែង ការណ៍ នោះ ក្រសួង បាន លើក ឡើង ថា ការ រាយ លួសបន្លា បស់ ភាគី ថៃ នេះ ផ្ទុយ នឹង សេចក្តី ប្រកាស រួម នៃ កិច្ចប្រជុំ ពិសេស លើក ទី ៣ របស់ គណៈកម្មាធិការ ព្រំដែន ទូទៅ (GBC) ដែល បាន ធ្វើ ឡើង កាលពី ថ្ងៃ ទី ២៧ ខែ ធ្នូ ឆ្នាំ ២០២៥ ។ សេចក្តី ប្រកាស នោះ បាន ដាក់ ចេញ វិធាន ការ កាត់បន្ថយ ភាពតានតឹង នៅ តាម ព្រំដែន ។ ក្រៅ ពី នេះ សកម្មភាព ដាក់ លួសបន្លា ក៏ ជា ការ រំលោភ លើ មាត្រា ៥ នៃ អនុស្សរណៈ នៃ ការ យោគយល់ គ្នា រវាង រាជរដ្ឋាភិបាល កម្ពុជា និង រាជរដ្ឋាភិបាល ថៃ ឆ្នាំ ២០០០ (MOU 2000) ស្តីពី ការ វាស់ វែង និង ខណ្ឌ សីមា ព្រំដែន គោក ផង ដែរ ។

រាជរដ្ឋាភិបាល កម្ពុជា បាន ទាមទារ ឲ្យ ភាគី ថៃ បញ្ឈប់ ជា បន្ទាន់ រាល់ សកម្មភាព ដាក់ លួសបន្លា និង សកម្មភាព ដទៃ ទៀត នៅ តាម បណ្តោយ ព្រំដែន ។ កម្ពុជា ក៏ បាន ស្នើ ឲ្យ ថៃ ដក កង កម្លាំង របស់ ខ្លួន ចេញ ពី តំបន់ ដែល បាន កាន់កាប់ ដោយ ខុសច្បាប់ ចាប់តាំងពី ឆ្នាំ ២០២៥ មក ។ « កម្ពុជា សូម បញ្ជាក់ ថា ការ បន្ថយ ភាពតានតឹង គឺ ជា កត្តា ចាំបាច់ ដើម្បី ជំរុញ ការ ជឿ ទុក ចិត្ត គ្នា ទៅវិញទៅមក និង ជួយ សម្រួល ដល់ ដំណោះស្រាយ ប្រកប ដោយ សន្តិវិធី និង យូរ អង្វែង នៃ ជម្លោះ ព្រំដែន ដើម្បី ស្តារ សន្តិភាព ស្ថិរភាព និង ទំនាក់ទំនង ភាព ជា អ្នក ជិតខាង ល្អ តាម បណ្តោយ ព្រំដែន កម្ពុជា-ថៃ » នេះ បើ តាម ការ ដក ស្រង់ សេចក្តី ថ្លែង ការណ៍ របស់ ក្រសួង ដោយ ភ្នំពេញប៉ុស្តិ៍ ។

មួយ វិញ ទៀត ក្រសួង បាន សង្កត់ ធ្ងន់ ថា បន្ទាត់ ព្រំដែន មិន អាច ប្តូរ ដោយ ការ ប្រើ កម្លាំង បាន ឡើយ ហើយ ត្រូវ តែ ដោះស្រាយ តាម សន្តិវិធី ផ្អែក លើ ច្បាប់ អន្តរជាតិ និង កិច្ចព្រមព្រៀង ទ្វេភាគី ដែល មាន ស្រាប់ ។ កម្ពុជា បាន ប្តេជ្ញា ចិត្ត ថា នឹង បន្ត ដោះស្រាយ ជម្លោះ ព្រំដែន ជាមួយ ថៃ ក៏ ដូចជា ជាមួយ ប្រទេស ជិតខាង ទាំងអស់ ដោយ សន្តិវិធី ដើម្បី ស្តារ និង ថែរក្សា សន្តិភាព ស្ថិរភាព និង ទំនាក់ទំនង ល្អ រវាង គ្នា ។