ក្រុងតូក្យូ — នៅថ្ងៃទី ២៦ កក្កដានេះ កាសែតនានាបានរាយការណ៍ថា ជប៉ុនកំពុងរៀបចំ ដាក់ចេញបទប្បញ្ញត្តិថ្មី ដែលនឹងធ្វើឲ្យការទទួលបាន ស្ថានភាពស្នាក់នៅអចិន្ត្រៃយ៍ សម្រាប់ជនបរទេស មានភាពតឹងរ៉ឹងជាងមុន។ កាសែត Nikkei Asia បានរាយការណ៍ថា គម្រោងនេះជាផ្នែកមួយ នៃកំណែទម្រង់ប្រព័ន្ធ អន្តោប្រវេសន៍របស់ជប៉ុន។

តាមការរាយការណ៍របស់ The Straits Times ដែលចុះផ្សាយ នៅថ្ងៃទី ២៥ កក្កដា លក្ខខណ្ឌថ្មីនឹងយក សមត្ថភាពភាសាជប៉ុន របស់អ្នកដាក់ពាក្យ មកពិចារណាជាចំបង។ រីឯ The Japan Times នៅថ្ងៃទី ២៦ កក្កដា បានរាយការណ៍ថា តម្រូវការប្រាក់ចំណូល និងភស្តុតាង នៃការបង់វិភាគទាន សោធននិវត្តន៍ ក៏នឹងត្រូវបានដាក់បញ្ចូល ក្នុងលក្ខខណ្ឌថ្មីនេះដែរ។

ស្របពេលជាមួយគ្នានេះ កាសែត Nikkei Asia ក៏បានរាយការណ៍ ដាច់ដោយឡែកទៀតថា ជប៉ុនគ្រោងនឹង បង្កើនចំនួនបុគ្គលិក ផ្នែកអន្តោប្រវេសន៍ ក្នុងគោលបំណង បង្ក្រាបជនបរទេស ដែលស្នាក់នៅលើសរយៈពេល ទិដ្ឋាការ។ ទោះជាយ៉ាងណា របាយការណ៍ទាំងនេះ មិនបានបញ្ជាក់ ថាតើច្បាប់ថ្មីនឹងចូលជាធរមាន នៅពេលណាឲ្យប្រាកដនោះទេ។