នៅថ្ងៃទី២៨ ខែកក្កដា ឆ្នាំ២០២៦ សារព័ត៌មាន BBC និងកាសែត The Guardian បានរាយការណ៍ថា តារាចម្រៀងប៉ុបរូបនេះបានដាក់ពាក្យបណ្តឹងនេះកាលពីថ្ងៃចន្ទ ទី២៧ ខែកក្កដា។ ពាក្យបណ្តឹងនេះមិនបានបញ្ចេញឈ្មោះពិតរបស់ Hacker ទេ ដោយហៅពួកគេថា "John Doe" ជំនួសវិញ ដើម្បីធ្វើការស្វែងរកអត្តសញ្ញាណពិតនៅពេលក្រោយ។

The Guardian បានរាយការណ៍បន្ថែមថា ក្នុងឯកសារតុលាការ Grande មានគោលបំណងស្វែងរក "ជនខុសឆ្គងដែលលាក់ខ្លួនក្នុងស្រមោល និងបង្កភាពវឹកវរបច្ចេកវិទ្យាដោយគ្មានការដាក់ទោស" ហើយនាងចង់ "កាន់កាប់ពួកគេឲ្យទទួលខុសត្រូវចំពោះទង្វើឈ្លានពាន និងគួរឲ្យស្អប់ខ្ពើម" នេះ។ Hacker ទាំងនោះត្រូវបានចោទប្រកាន់ថាបានលួចយកចម្រៀង រូបថត និងវីដេអូឯកជន ហើយយកទៅលក់តាមគេហទំព័រអនឡាញ។

BBC បានរាយការណ៍ផងដែរថា Hacker ទាំងនោះបានចូលទៅក្នុងប្រព័ន្ធរបស់ Grande និងទទួលបានចម្រៀងដែលមិនទាន់ចេញផ្សាយ និងរូបថតឯកជន មុនពេលបញ្ចេញលេចធ្លាយតាមអនឡាញ។ The Guardian ក៏បានបញ្ជាក់ដែរថា ពួក Hacker ក៏បានយកឯកសារទាំងនោះទៅលក់នៅលើប្រព័ន្ធអនឡាញផងដែរ។

គេហទំព័រ AsiaOne របស់ប្រទេសសិង្ហបុរី បានរាយការណ៍បន្ថែមថា មាន Hacker ចំនួនពីរនាក់ពាក់ព័ន្ធនៅក្នុងរឿងក្តីនេះ ប៉ុន្តែព័ត៌មានលម្អិតអំពីជនសង្ស័យទាំងនោះនៅមិនទាន់ត្រូវបានបញ្ចេញឲ្យសាធារណជនបានដឹងនៅឡើយទេ។