ភ្នំពេញប៉ុស្តិ៍បានរាយការណ៍ថា លោក Elbridge A. Colby អនុរដ្ឋមន្ត្រីក្រសួងសង្គ្រាមសហរដ្ឋអាមេរិក ទទួលបន្ទុកគោលនយោបាយ នឹងមកដល់កម្ពុជា នៅយប់ថ្ងៃទី១៣ ខែសីហា ដើម្បីពិភាក្សាការងារជាមួយភាគីកម្ពុជា នៅថ្ងៃទី១៤ ខែសីហា។ ដំណើរនេះជាផ្នែកមួយ នៃដំណើរទស្សនកិច្ចរបស់លោក ទៅកាន់ប្រទេសចំនួន ៤ នៅអាស៊ីអាគ្នេយ៍ រួមមាន ហ្វីលីពីន ឥណ្ឌូនេស៊ី ថៃ និងកម្ពុជា។ ដំណើរទស្សនកិច្ចកម្ពុជានេះ ត្រូវបានមើលឃើញថា ជាការពង្រឹងទំនាក់ទំនងផ្នែកការពារជាតិ។

ក្នុងសន្និសីទសារព័ត៌មានតាមអនឡាញ កាលពីថ្ងៃទី១៣ ខែសីហា លោក Colby បានថ្លែងថា សហរដ្ឋអាមេរិកមានកម្មវិធីប្រាកដនិយម ដែលរៀបចំឡើងដើម្បីជួយកម្ពុជា ការពារបូរណភាពទឹកដី និងអធិបតេយ្យភាពរបស់ខ្លួន។ លោកបានបន្ថែមថា ភាគីទាំងពីរបានសម្រេចវឌ្ឍនភាពរួចហើយ ក្នុងរយៈពេលប្រហែលមួយឆ្នាំកន្លងមកជាមួយភ្នំពេញ ហើយលោកទន្ទឹងរង់ចាំ ពង្រីកភាពជាដៃគូការពារជាតិជាមួយកម្ពុជា បន្តទៅមុខទៀត។

RFI បានរាយការណ៍ថា លោក Colby បានអះអាងថា លោកមកបំពេញទស្សនកិច្ចនៅទីក្រុងភ្នំពេញ នាថ្ងៃទី១៤ ខែសីហា ដើម្បីជួបជជែកជាមួយរដ្ឋាភិបាលកម្ពុជា ពីការចាប់ផ្តើមលំហាត់សមយុទ្ធ «ឆ្មាំអង្គរ» ឡើងវិញ ក្នុងគោលដៅពង្រឹងកិច្ចសហប្រតិបត្តិយោធា រវាងសហរដ្ឋអាមេរិក និងកម្ពុជា។

ភ្នំពេញប៉ុស្តិ៍បានរៀបរាប់បន្ថែមថា រដ្ឋមន្ត្រីការបរទេសសហរដ្ឋអាមេរិក លោក Marco Rubio បានថ្លែងកាលពីពេលថ្មីៗនេះថា សហរដ្ឋអាមេរិកកំពុងមានទំនាក់ទំនងយ៉ាងជិតស្និទ្ធជាមួយកម្ពុជា ដែលមិនធ្លាប់មានពីមុនមក។ ទោះជាយ៉ាងណា ភ្នំពេញប៉ុស្តិ៍បានសាកសួរអំពីជំហររបស់សហរដ្ឋអាមេរិក ពាក់ព័ន្ធនឹងជម្លោះព្រំដែនកម្ពុជា-ថៃ ប៉ុន្តែមិនទាន់មានការឆ្លើយតប។