យោងតាមការរាយការណ៍របស់ Phnom Penh Post កាលពីថ្ងៃទី ១៣ ខែសីហា ការជំរុញនេះត្រូវបានលើកឡើងក្នុងជំនួបថ្ងៃទី ១២ ខែសីហា នៅទីស្តីការក្រសួងយុត្តិធម៌ រវាងលោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងលោកស្រី Aleks Zittle ភារធារីស្ថានទូតសហរដ្ឋអាមេរិកប្រចាំកម្ពុជា។ ស្ថានទូតបានគូសបញ្ជាក់ពីសារៈសំខាន់នៃការស៊ើបអង្កេត និងនាំខ្លួនអ្នករៀបចំ អ្នកបញ្ជា និងអ្នកសម្របសម្រួលទៅកាត់ទោសតាមច្បាប់ ដោយផ្តោតលើការទទួលខុសត្រូវរបស់អ្នកដឹកនាំ ជាជាងអ្នកចូលរួមថ្នាក់ក្រោម។ ស្ថានទូតក៏បានឱ្យដឹងថា ភាគីទាំងពីរបានពិភាក្សាអំពីជំនួយបច្ចេកទេសយ៉ាងទូលំទូលាយ ដែលអាមេរិកកំពុងផ្តល់ជូនដើម្បីទប់ស្កាត់មជ្ឈមណ្ឌលឆបោកតាមអនឡាញ ហើយបានបញ្ជាក់ថា «សហរដ្ឋអាមេរិក គាំទ្រកិច្ចខិតខំប្រឹងប្រែងរបស់កម្ពុជា ក្នុងការប្រយុទ្ធប្រឆាំងឧក្រិដ្ឋកម្មឆ្លងដែន រួមទាំងការឆបោកតាមអនឡាញ»។

គេហទំព័រគណបក្សប្រជាជនកម្ពុជាបានផ្សព្វផ្សាយថា លោក កើត រិទ្ធ បានបញ្ជាក់ប្រាប់ភារធារីស្ថានទូតអាមេរិកថា កម្ពុជា «ប្តេជ្ញាចិត្តឥតរាថយ ក្នុងការបោសសម្អាត Online Scams»។ យោងតាម Phnom Penh Post ក្រសួងយុត្តិធម៌ក៏បានបញ្ជាក់ពីការប្តេជ្ញាចិត្តបោសសម្អាតបទល្មើសឆបោកតាមប្រព័ន្ធបច្ចេកវិទ្យា និងការពង្រឹងកិច្ចសហប្រតិបត្តិការអនុវត្តច្បាប់ជាមួយទីក្រុងវ៉ាស៊ីនតោន។ សារព័ត៌មាន Fresh News ក៏បានរាយការណ៍ផងដែរថា កម្ពុជាប្តេជ្ញាពង្រឹងកិច្ចសហប្រតិបត្តិការប្រយុទ្ធប្រឆាំងបទល្មើសឆបោកតាមប្រព័ន្ធបច្ចេកវិទ្យា។

នៅក្នុងវេទិកាភ្នំពេញលើកទី ៥ ថ្ងៃទី ១៣ ខែសីហា អ្នកនាំពាក្យក្រសួងមហាផ្ទៃ លោក ទូច សុខៈ បានថ្លែងថា កម្ពុជាកំពុងខិតខំយ៉ាងខ្លាំងក្នុងការប្រយុទ្ធប្រឆាំងនឹងបទល្មើសទាំងនេះ និងធ្វើការជិតស្និទ្ធជាមួយដៃគូក្នុងតំបន់ និងពិភពលោក។ យោងតាមការរាយការណ៍របស់ Phnom Penh Post លោកបានបញ្ជាក់ថា ចាប់ពីខែកក្កដា ឆ្នាំ ២០២៥ ដល់ខែមិថុនា ឆ្នាំនេះ កម្ពុជាបានលុបបំបាត់ទីតាំងឆបោក ៦៥០ កន្លែង រួមមានមជ្ឈមណ្ឌល ៥៨២ និងទីតាំងគាំទ្រ ៦៨ កន្លែង ហើយបានបញ្ជូនសំណុំរឿង ២៦៨ ទៅតុលាការ ដោយមានមនុស្ស ២.៧៧៣ នាក់ជាប់ចោទ។