ភ្នំពេញប៉ុស្តិ៍ និង Khmer Times បានរាយការណ៍ថា លោក លុយ ដាវីត ឯកអគ្គរាជទូតកម្ពុជាប្រចាំប្រទេសបារាំង បានបង្ហើបឲ្យដឹងថា ឯកអគ្គរាជទូតថៃប្រចាំបារាំង បានព្យាយាមឲ្យឯកអគ្គរដ្ឋទូតនៃប្រទេសទីបីមួយ មកបញ្ចុះបញ្ចូលលោក កុំឲ្យលើកឡើងពីបញ្ហាជម្លោះព្រំដែនកម្ពុជា-ថៃ នៅក្នុងវេទិកាហ្វ្រង់កូហ្វូនី។ ភ្នំពេញប៉ុស្តិ៍បានរាយការណ៍ថា មន្ត្រីការទូតថៃរូបនោះបានខ្ចីដៃភាគីទី៣ មកប្រាប់កម្ពុជាកុំឲ្យលើកឡើងពីការឈ្លានពានរបស់ពួកគេលើកម្ពុជា។ លោកបានឆ្លើយតបថា គ្មានហេតុផលអ្វីដែលលោកត្រូវនៅស្ងៀមនោះទេ។

លោក លុយ ដាវីត ដែលបានសរសេរសារនេះនៅថ្ងៃទី២ ខែកញ្ញា ឆ្នាំ២០២៦ ត្រូវបានភ្នំពេញប៉ុស្តិ៍ដកស្រង់សម្តីថា៖ «គួរឱ្យអស់សំណើចមែន! ឯកអគ្គរាជទូតផ្ទះលេខ ២ បានព្យាយាមឱ្យឯកអគ្គរដ្ឋទូតនៃប្រទេសទីបីមួយ មកបញ្ចុះបញ្ចូលខ្ញុំ កុំឱ្យលើកឡើងពីបញ្ហាជម្លោះព្រំដែនកម្ពុជា-ថៃ នៅក្នុងវេទិកាហ្វ្រង់កូហ្វូនី»។ លោកបានបន្តថា៖ «ខ្ញុំបានឆ្លើយតបយ៉ាងច្បាស់ថា ប្រទេសរបស់លោកបានឈ្លានពានប្រទេសរបស់ខ្ញុំ ហើយថែមទាំងព្យាយាមបំភ្លៃការពិត ដោយប្រែក្លាយខ្មៅទៅជាស និងសទៅជាខ្មៅ»។ លោកបានបញ្ជាក់ថា ក្នុងនាមជាអ្នកការទូតកម្ពុជា លោកមានកាតព្វកិច្ចការពារផលប្រយោជន៍ជាតិ ការពារការពិត និងប្រាប់សហគមន៍អន្តរជាតិឲ្យដឹងថា ភាគីណាជាអ្នកឈ្លានពាន និងភាគីណាជាជនរងគ្រោះ។

តាមភ្នំពេញប៉ុស្តិ៍ ការព្យាយាមបិទបាំងបញ្ហាព្រំដែននៅលើឆាកអន្តរជាតិនេះ កើតឡើងខណៈកម្ពុជាកំពុងត្រៀមធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកទី២០ នៅពាក់កណ្តាលខែវិច្ឆិកា ឆ្នាំ២០២៦។ កាសែតដដែលក៏បានរាយការណ៍ថា យោធាថៃបន្តកាន់កាប់ទឹកដីកម្ពុជាជាច្រើនទីតាំង ព្រមទាំងធ្វើសកម្មភាពកែប្រែលើដីថ្មី ដែលគេស្គាល់ថា fait accompli។

តាមការរាយការណ៍របស់ RFI បន្ទាប់ពីការបង្ហោះសាររបស់ឯកអគ្គរាជទូតកម្ពុជានៅលើបណ្តាញសង្គម អ្នកតាមដាននយោបាយ និងជម្លោះខ្មែរ-ថៃ បានមើលឃើញពីភាពចាំបាច់ដែលកម្ពុជាត្រូវឆ្លៀតលើកឡើងពីជម្លោះព្រំដែនខ្មែរ-ថៃ នៅរាល់វេទិកាហ្វ្រង់កូហ្វូនី និងវេទិកាអន្តរជាតិផ្សេងៗទៀត។