សន្និសីទអន្តរជាតិស្តីពីការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (ICCOS) នៅទីក្រុងភ្នំពេញ បានបិទបញ្ចប់ជាផ្លូវការនៅរសៀលថ្ងៃទី២៤ ខែកញ្ញា ឆ្នាំ២០២៦ ដោយកម្ពុជា និងតំណាងរដ្ឋាភិបាលចំនួន ២៧ប្រទេស បានអនុម័តសេចក្តីប្រកាសទីក្រុងភ្នំពេញដែលមាន ១១ចំណុច ដើម្បីឈានទៅកាត់ផ្តាច់ច្រវាក់ឆបោកអនឡាញ និងបណ្តាញឧក្រិដ្ឋកម្មឆ្លងដែន។ នេះបើតាមការរាយការណ៍របស់ RFI។

RFI បានរាយការណ៍ថា សេចក្តីប្រកាសរួមនេះបានអំពាវនាវឱ្យសហគមន៍អន្តរជាតិបន្តពង្រឹងកិច្ចសហប្រតិបត្តិការក្នុងការប្រយុទ្ធប្រឆាំងការឆបោកអនឡាញ និងបទល្មើសឆ្លងដែនពាក់ព័ន្ធផ្សេងទៀត។ តាម RFI ដដែល លោកនាយករដ្ឋមន្ត្រី ហ៊ុន ម៉ាណែត បានអះអាងថា អំពើឆបោកអនឡាញពុំមែនកើតចេញពីកម្ពុជានោះទេ ហើយកម្ពុជាក៏ជាអ្នករងគ្រោះដែរ។

ប៉ុន្តែអ្នកវិភាគនយោបាយ និងកិច្ចការអន្តរជាតិដែល RFI បានស្រង់សម្តី យល់ស្របថាកម្ពុជាជាប្រទេសរងគ្រោះ ប៉ុន្តែពួកគេយល់ថាកម្ពុជាក៏មានចំណែកទទួលខុសត្រូវដែរ ព្រោះមន្ត្រីក្នុងជួររដ្ឋាភិបាលមួយចំនួនជាអ្នកទទួលបានផលប្រយោជន៍ និងការពារក្រុមឧក្រិដ្ឋជនទាំងនោះ។ សម្រាប់ពួកគេ កិច្ចសហការជាមួយអន្តរជាតិក្នុងបទល្មើសឆបោកអនឡាញ មិនមែនជាការជ្រៀតជ្រែកផ្ទៃក្នុងកម្ពុជានោះទេ ហើយកម្ពុជាត្រូវបង្ហាញឆន្ទៈពិតប្រាកដជាមួយសហគមន៍អន្តរជាតិ។

ទន្ទឹមនឹងនេះ Phnom Penh Post បានរាយការណ៍ថា លោក ស ថេត អគ្គស្នងការនគរបាលជាតិ បានថ្លែងនៅក្នុងសន្និសីទនេះថា ពលរដ្ឋខ្មែរបានចាញ់បោកតាមអនឡាញអស់ប្រាក់ប្រមាណ ២៦,២លានដុល្លារ គិតចាប់ពីឆ្នាំ២០២៥ ដល់រយៈពេល ៨ខែនៃឆ្នាំ២០២៦។ លោកបានឱ្យដឹងថា ក្នុងឆ្នាំ២០២៥ សមត្ថកិច្ចទទួលបណ្តឹងចំនួន ១១៣៦បណ្តឹង ដែលមានទឹកប្រាក់ប្រមាណ ៤,៧លានដុល្លារ ដោះស្រាយបានតែ ៥១ករណី ខណៈ ៨ខែឆ្នាំ២០២៦ មានបណ្តឹង ១០៨៤បណ្តឹង ទឹកប្រាក់ប្រមាណ ២១,៥លានដុល្លារ ដោះស្រាយបាន ៤២បណ្តឹង។ សរុបតាមលេខទាំងពីរនេះ សមត្ថកិច្ចទទួលបណ្តឹង ២២២០បណ្តឹង និងដោះស្រាយបាន ៩៣ករណីប៉ុណ្ណោះ។

តាម Phnom Penh Post ដដែល លោក ស ថេត បានពន្យល់ថា កម្ពុជាជួបបញ្ហាលំបាកមួយចំនួនក្នុងការបង្ក្រាបទប់ស្កាត់បទល្មើសតាមបច្ចេកវិទ្យា ដូចជាការវិវត្តនៃប្រព័ន្ធបច្ចេកវិទ្យា និងទូរគមនាគមន៍ដែលក្រុមឧក្រិដ្ឋជនបានប្រើប្រាស់ បញ្ហាពាក់ព័ន្ធនឹងចរន្តផ្ទេរប្រាក់ និងការអប់រំឱ្យពលរដ្ឋយល់ដឹងអំពីបញ្ហានេះដែលនៅទាបនៅឡើយ។ លោកបានបន្ថែមថា ការបង្ក្រាបចាប់បានតែអ្នកប្រព្រឹត្តតូចតាច និងអ្នកគ្រប់គ្រង ចំណែកមេខ្លោងធំៗស្ថិតនៅក្រៅប្រទេស ដែលធ្វើឱ្យការកាត់ផ្ដាច់ឫសគល់មិនទាន់អាចធ្វើបាន។