ការផ្ទុះវីរុសហាន់តា លើកប៉ាល់ទេសចរណ៍ បណ្តាលឲ្យស្លាប់៣នាក់

តាមការរាយការណ៍របស់ The Guardian បុគ្គលិកនាវាជនជាតិអង់គ្លេសម្នាក់ កំពុងត្រូវការការព្យាបាលវេជ្ជសាស្ត្របន្ទាន់ ហើយអ្នកដំណើរមកពីចក្រភពអង់គ្លេសម្នាក់ទៀត នៅតែស្ថិតក្នុងស្ថានភាពធ្ងន់ធ្ងរ ក្រោយការផ្ទុះសង្ស័យនៃវីរុសហាន់តា លើកប៉ាល់ទេសចរណ៍ប្រណីតមួយ នៅមហាសមុទ្រអាត្លង់ទិក។

The Guardian បន្ថែមថា មនុស្ស៣នាក់បានស្លាប់ ហើយក្រុមវេជ្ជបណ្ឌិត កំពុងប្រញាប់ជម្លៀសអ្នកជំងឺ២នាក់ផ្សេងទៀត ចេញពីកប៉ាល់ MV Hondius ដែលបានចេញដំណើរ កាលពីខែមីនា ពីភាគខាងត្បូងប្រទេសអាហ្សង់ទីន ដោយដឹកមនុស្ស១៤៩នាក់ មកពី២៣ប្រទេស។ វិបត្តិនេះបានលេចឡើង នៅយប់ថ្ងៃអាទិត្យ បន្ទាប់ពីអង្គការសុខភាពពិភពលោក បានប្រកាសថា ខ្លួនកំពុងស៊ើបអង្កេតការផ្ទុះជំងឺសង្ស័យនេះ។

តាម South China Morning Post ការផ្ទុះវីរុសហាន់តា ដែលជាប់ពាក់ព័ន្ធនឹងកប៉ាល់នេះ នៅឯនាយឆ្នេរប្រទេស Cabo Verde បានកើនដល់៧ករណី រួមមាន២ករណីដែលត្រូវបានបញ្ជាក់ ខណៈពេលដែលអង្គការសុខភាពពិភពលោក បានប្រកាសព័ត៌មាននេះ កាលពីថ្ងៃច័ន្ទ។ កប៉ាល់ MV Hondius ដែលបានចុះទង់ជាតិហុល្លង់ កំពុងដឹកអ្នកដំណើរ និងបុគ្គលិកសរុប១៤៧នាក់ មកពី២៣ប្រទេស។

South China Morning Post រាយការណ៍បន្ថែមថា ក្នុងចំណោមអ្នកដំណើរ មានជនជាតិអាមេរិក១៧នាក់ អង់គ្លេស១៩នាក់ និងអេស្ប៉ាញ១៣នាក់ ព្រមទាំងបុគ្គលិកនាវា៦១នាក់។ ក្នុងចំណោម៧ករណីដែលបានកំណត់អត្តសញ្ញាណ អ្នកដំណើរអង់គ្លេសម្នាក់ កំពុងស្ថិតក្នុងផ្នែកព្យាបាលដោយប្រុងប្រយ័ត្ន នៅទីក្រុង Johannesburg។

វីរុសហាន់តា ជាជំងឺឆ្លងដ៏កម្រ ដែលជាទូទៅ ឆ្លងតាមរយៈការប៉ះពាល់ជាមួយសត្វកកេរ ហើយអាចបង្កឲ្យមានជំងឺផ្លូវដង្ហើមធ្ងន់ធ្ងរ