យោងតាមការរាយការណ៍របស់ BBC កាលពីថ្ងៃព្រហស្បតិ៍ ទី៧ ខែឧសភា ឆ្នាំ២០២៦ នេះ ប្រធានាធិបតីនៃសហរដ្ឋអាមេរិក លោក ដូណាល់ ត្រាំ បានថ្លែងថា EU ត្រូវតែអនុវត្តកិច្ចព្រមព្រៀងពាណិជ្ជកម្មដែលបានឯកភាពគ្នាកាលពីឆ្នាំមុន ហើយត្រូវបញ្ចុះពន្ធលើទំនិញអាមេរិកឲ្យមកនៅត្រឹម ០% ត្រឹមថ្ងៃទី ៤ ខែកក្កដា ឆ្នាំ២០២៦។

សារព័ត៌មាន DW របស់អាល្លឺម៉ង់ បានរាយការណ៍ស្របគ្នាដែរ ដោយបន្ថែមថា លោក ត្រាំ បានគម្រាមដំឡើងពន្ធលើទំនិញ EU ឲ្យកាន់តែខ្ពស់ ប្រសិនបើក្រុមប្លុកនេះមិនគោរពតាមកាលកំណត់។

កាសែត The Straits Times បានរាយការណ៍ថា ការដំឡើងពន្ធនេះនឹងធ្វើឲ្យពន្ធលើរថយន្ត និងរថយន្តដឹកទំនិញដែលនាំចូលពី EU កើនឡើងពី ១៥% ទៅ ២៥%។ NDTV ក៏បានរាយការណ៍ដូចគ្នានេះដែរ ដោយបញ្ជាក់ថាកាលពីសប្តាហ៍មុន លោក ត្រាំ ធ្លាប់បានគម្រាមដំឡើងពន្ធទាំងនេះដោយសារ EU មិនបានគោរពតាមលក្ខខណ្ឌនៃកិច្ចព្រមព្រៀងដែលបានចុះហត្ថលេខានៅប្រទេសស្កុតឡែនកាលពីខែកក្កដាឆ្នាំមុន។

SCMP បានរាយការណ៍ថា លោក ត្រាំ បានពិភាក្សាតាមទូរស័ព្ទជាមួយប្រធានគណៈកម្មការអឺរ៉ុប អ្នកស្រី Ursula von der Leyen បន្ទាប់ពីមន្ត្រីអឺរ៉ុបមិនអាចឈានដល់ការឯកភាពគ្នាលើកិច្ចព្រមព្រៀងនេះ។ លោកបានប្រាប់ថា «ខ្ញុំយល់ព្រមឲ្យពេលគាត់ដល់ថ្ងៃខួប ២៥០ ឆ្នាំរបស់ប្រទេសយើង»។ ថ្ងៃទី ៤ កក្កដា ឆ្នាំ២០២៦ នេះ គឺជាទិវាឯករាជ្យគម្រប់ ២៥០ ឆ្នាំរបស់សហរដ្ឋអាមេរិក ដែលលោក ត្រាំ បានប្រើជាកាលបរិច្ឆេទផុតកំណត់។

ទោះជាយ៉ាងនេះក្តី លោក ត្រាំ បានព្រមានថា ប្រសិនបើកិច្ចព្រមព្រៀងមិនត្រូវបានអនុម័តនៅត្រឹមថ្ងៃកំណត់ «ពន្ធនឹងកើនឡើងដល់កម្រិតខ្ពស់ជាងនេះច្រើន»ភ្លាមៗ តាមការរាយការណ៍របស់ SCMP។