នៅថ្ងៃសៅរ៍ ទី៩ ខែឧសភា ឆ្នាំ២០២៦ ក្រសួងការពារជាតិនៃចក្រភពអង់គ្លេសបានប្រកាសថា ខ្លួននឹងដាក់ពង្រាយនាវាចម្បាំង HMS Dragon ទៅកាន់តំបន់មជ្ឈិមបូព៌ា នេះបើយោងតាមការរាយការណ៍ពីសារព័ត៌មាន BBC និងកាសែត The Straits Times របស់ប្រទេសសិង្ហបុរី។

BBC បានរាយការណ៍បន្ថែមថា ក្រសួងបានបញ្ជាក់ថា នាវាចម្បាំងនេះនឹងរៀបចំខ្លួនដើម្បីចូលរួមក្នុងបេសកកម្មអន្តរជាតិមួយ ដែលមានគោលដៅការពារការដឹកជញ្ជូនតាមសមុទ្រ។ ប៉ុន្តែ ការចូលរួមនេះនឹងប្រព្រឹត្តទៅបាន លុះត្រាតែការប្រយុទ្ធគ្នានៅក្នុងតំបន់បានបញ្ចប់ជាមុនសិន។

ចំណែកកាសែត The Straits Times វិញបានរាយការណ៍ថា ចក្រភពអង់គ្លេសបានសម្រេចដាក់ពង្រាយនាវា HMS Dragon នេះ ដើម្បីត្រៀមសម្រាប់កិច្ចខិតខំប្រឹងប្រែងពហុជាតិ ក្នុងការការពារនាវាដឹកជញ្ជូនឆ្លងកាត់ច្រក Hormuz នៅពេលដែលលក្ខខណ្ឌក្នុងតំបន់អនុញ្ញាត។

តាមការរាយការណ៍របស់ BBC មន្រ្តីក្រសួងការពារជាតិចក្រភពអង់គ្លេសមិនបានផ្តល់ពេលវេលាជាក់លាក់ណាមួយសម្រាប់ការចេញដំណើររបស់នាវា HMS Dragon ទេ ហើយក៏មិនបានកំណត់កាលបរិច្ឆេទចាប់ផ្តើមនៃបេសកកម្មអន្តរជាតិនេះដែរ។