អេស្ប៉ាញរកឃើញករណីមេរោគហាន់តាថ្មីពីនាវាកម្សាន្ត ការផ្ទុះឡើងកើនដល់ ១១ ករណី

SCMP បានរាយការណ៍នៅថ្ងៃអង្គារ ទី១២ ខែឧសភាថា ក្រសួងសុខាភិបាលអេស្ប៉ាញបានប្រកាសពីករណីឆ្លងមេរោគហាន់តាថ្មីមួយទៀត ដែលត្រូវបានរកឃើញលើអ្នកដំណើរជនជាតិអេស្ប៉ាញម្នាក់ ដែលបានជម្លៀសចេញពីនាវាកម្សាន្ត MV Hondius ។ តាមរបាយការណ៍ដដែល អង្គការសុខភាពពិភពលោកបានបញ្ជាក់ថា ការផ្ទុះឡើងនៃមេរោគនេះកើនដល់ ១១ ករណី រួមទាំងអ្នកស្លាប់ចំនួន ៣ នាក់ ដែលសុទ្ធជាអ្នកដំណើរមកពីនាវានេះ។

SCMP បានបន្ថែមថា អ្នកដំណើរដែលឆ្លងមេរោគនេះកំពុងស្ថិតក្នុងការដាក់ដោយឡែកនៅមន្ទីរពេទ្យយោធាមួយក្នុងទីក្រុងម៉ាឌ្រីដ។ ជាមួយគ្នានេះ មានជនជាតិអេស្ប៉ាញ ១៣ នាក់ផ្សេងទៀត ដែលបានជម្លៀសពីនាវា MV Hondius កាលពីថ្ងៃអាទិត្យ ក៏កំពុងស្ថិតក្នុងមន្ទីរពេទ្យនោះដែរ ហើយពួកគេទាំងអស់ធ្វើតេស្តរកមេរោគបានលទ្ធផលអវិជ្ជមាន។

ចំណែក Al Jazeera បានរាយការណ៍ដូចគ្នាដោយដកស្រង់ការប្រកាសរបស់ក្រសួងសុខាភិបាលអេស្ប៉ាញថា បុរសដែលឆ្លងមេរោគនេះគឺជាម្នាក់ក្នុងចំណោមអ្នកដំណើរនិងសមាជិកនាវិកជាង ១២០ នាក់ ដែលត្រូវបានជម្លៀសចេញពីនាវា MV Hondius ។ ក្រសួងបានបញ្ជាក់ថា ការជម្លៀសនេះបានធ្វើឡើងបន្ទាប់ពីរកឃើញការផ្ទុះឡើងនៃមេរោគនៅលើនាវា។