ទីភ្នាក់ងារសុខភាពសាធារណៈកាណាដា បានប្រកាសកាលពីថ្ងៃសៅរ៍ ទី១៦ ខែឧសភា ថា អ្នកដំណើរជនជាតិកាណាដាម្នាក់ ដែលជាអតីតអ្នកជិះនាវាទេសចរណ៍ MV Hondius បានធ្វើតេស្តរកឃើញថាមានផ្ទុកមេរោគហង់តាប្រភេទ Andes ជាលទ្ធផលវិជ្ជមានបឋម។ តាមការរាយការណ៍របស់ BBC និង The Guardian បុគ្គលនេះគឺជាម្នាក់ក្នុងចំណោមអតីតអ្នកដំណើរ៤នាក់ ដែលបានវិលត្រឡប់មកប្រទេសកាណាដាវិញ និងកំពុងស្ថិតក្រោមការដាក់ឱ្យនៅដាច់ដោយឡែកនៅលើកោះ Vancouver ក្នុងខេត្ត British Columbia ចាប់តាំងពីពួកគេបានចាកចេញពីនាវានោះ។

វេជ្ជបណ្ឌិត Bonnie Henry មន្ត្រីសុខាភិបាលខេត្ត British Columbia បានឲ្យដឹងក្នុងសន្និសីទកាសែតថា អ្នកជំងឺរូបនេះមានរោគសញ្ញាស្រាលៗ ដូចជាគ្រុនក្តៅ និងឈឺក្បាល ដែលចាប់ផ្តើមកាលពីពីរថ្ងៃមុន ហើយត្រូវបានបញ្ជូនទៅមន្ទីរពេទ្យនៅទីក្រុង Victoria ដើម្បីពិនិត្យ និងធ្វើតេស្តបន្ថែម រួមជាមួយដៃគូរបស់គាត់ ដែលក៏ជាអ្នកជិះនាវាដូចគ្នា និងកំពុងនៅដាច់ដោយឡែកជាមួយគ្នា។ តាមការរាយការណ៍របស់ South China Morning Post វេជ្ជបណ្ឌិត Henry បានមានប្រសាសន៍ថា «ច្បាស់ណាស់ នេះមិនមែនជាអ្វីដែលយើងចង់ឃើញនោះទេ ប៉ុន្តែយើងបានរៀបចំផែនការរួចរាល់សម្រាប់ស្ថានភាពបែបនេះ»។

លទ្ធផលតេស្តសម្រាប់ការបញ្ជាក់ច្បាស់ការ ពីមន្ទីរពិសោធន៍មីក្រូជីវសាស្ត្រជាតិនៅទីក្រុង Winnipeg ត្រូវបានរំពឹងថានឹងចេញនៅចុងសប្តាហ៍នេះ ដើម្បីផ្ទៀងផ្ទាត់ថាតើអ្នកជំងឺពិតជាមានផ្ទុកមេរោគហង់តាឬអត់។ បច្ចុប្បន្ន អ្នកជំងឺស្ថិតក្នុងស្ថានភាពធម្យតា ហើយមន្ត្រីសុខាភិបាលកំពុងតាមដានយ៉ាងយកចិត្តទុកដាក់។

ការផ្ទុះឡើងនៃមេរោគហង់តានៅលើនាវា MV Hondius ត្រូវបានគេដឹងថាបានសម្លាប់មនុស្សយ៉ាងហោចណាស់៣នាក់ ក្នុងអំឡុងពេលធ្វើដំណើរកម្សាន្ត តាមការរាយការណ៍របស់ The Guardian ។ អ្នកដំណើរនិងនាវិកផ្សេងទៀត កំពុងត្រូវបានអាជ្ញាធរសុខាភិបាលតាមដាន ដើម្បីរកឱ្យឃើញសញ្ញានៃការឆ្លង។ ជនជាតិកាណាដាដែលនៅសល់៣នាក់ទៀត ក៏កំពុងបន្តស្ថិតនៅក្រោមការដាក់ឱ្យនៅដាច់ដោយឡែក ហើយកំពុងរង់ចាំលទ្ធផលតេស្តរបស់ខ្លួន ខណៈដែលក្រុមគ្រូពេទ្យតាមដានសុខភាពពួកគេយ៉ាងជិតស្និទ្ធ។ នេះជាករណីដំបូងនៅកាណាដា ដែលភ្ជាប់ទៅនឹងការផ្ទុះនៅលើនាវាទេសចរណ៍ MV Hondius នេះ។