NBC News និង The Verge បានរាយការណ៍ថា កាលពីថ្ងៃសុក្រ ទី១៥ ខែឧសភា ឆ្នាំ២០២៦ លោក Eric Schmidt អតីតនាយកប្រតិបត្តិក្រុមហ៊ុន Google បានទទួលការស្រែកជេរ និងស្រែកឡកឡឺយពីសំណាក់និស្សិតដែលទើបបញ្ចប់ការសិក្សានៅសាកលវិទ្យាល័យ Arizona សហរដ្ឋអាមេរិក។ ការស្រែកប្រឆាំងនេះបានកើតឡើងជាបន្តបន្ទាប់ នៅពេលដែលលោកកំពុងថ្លែងសុន្ទរកថាក្នុងពិធីប្រគល់សញ្ញាប័ត្រ នៅថ្ងៃសុក្រនោះ។

តាម The Verge លោក Schmidt ដែលបានអញ្ជើញឡើងថ្លែងសុន្ទរកថាលើកទឹកចិត្តដល់និស្សិត បានបែរការនិយាយរបស់លោកទៅកាន់ប្រធានបទស្តីពី AI និងអនាគតនៃការងារ។ បន្ទាប់ពីនោះ សំឡេងស្រែកឡកឡឺយ និងការមិនពេញចិត្តបានផ្ទុះឡើងកាន់តែខ្លាំង ធ្វើឲ្យសម្តីរបស់លោកត្រូវរំខាន និងមិនអាចស្តាប់ឮបាន។ The Verge បានពណ៌នាថា លោក Schmidt ហាក់ដូចជាមានការខកចិត្ត ប៉ុន្តែលោកនៅតែព្យាយាមបន្តការថ្លែង។

ក្នុងពេលជួបនឹងប្រតិកម្មនេះ លោក Schmidt បានទទួលស្គាល់ពីការព្រួយបារម្ភរបស់និស្សិត ហើយបានថ្លែងថា ការភ័យខ្លាចចំពោះការងារដែលត្រូវបាត់បង់ដោយសារបច្ចេកវិទ្យា គឺជារឿងសមហេតុផល។ តាមរយៈ The Verge ដែលបានដកស្រង់សម្តីពី Business Insider លោកបានបញ្ជាក់បន្ថែមថា "ការភ័យខ្លាចដែលថាម៉ាស៊ីនកំពុងមកដល់ ការងារកំពុងរលាយបាត់ អាកាសធាតុកំពុងប្រែប្រួល នយោបាយកំពុងបែកបាក់ ហើយអ្នកកំពុងទទួលមរតកនូវបញ្ហាដែលអ្នកមិនបានបង្កើត គឺជារឿងសមហេតុផល"។

មូលហេតុសំខាន់នៃការស្រែកប្រឆាំងនេះ ត្រូវបាន The Verge វិភាគថា គឺដោយសារតែនិស្សិតបញ្ចប់ការសិក្សាកំពុងប្រឈមមុខនឹងទីផ្សារការងារដែលរងគ្រោះយ៉ាងខ្លាំង ហើយ AI ត្រូវបានមើលឃើញថាជាកត្តាគំរាមកំហែងបន្ថែមទៀត។ The Verge បានកត់សម្គាល់ថា AI គឺជាប្រធានបទដែលមានភាពចម្រូងចម្រាសរួចទៅហើយ ហើយវាមិនមែនជារឿងគួរឱ្យភ្ញាក់ផ្អើលទេ ដែលនិស្សិតទាំងនេះមានអារម្មណ៍អវិជ្ជមានជាពិសេសចំពោះ AI។ NBC News ក៏បានរាយការណ៍ស្របគ្នាថា ការស្រែកជេរនេះបានកើតឡើងច្រើនដងក្នុងពេលថ្លែងសុន្ទរកថា។