យោងតាមសេចក្តីរាយការណ៍របស់សារព័ត៌មាន BBC និងកាសែត The Straits Times ប្រចាំប្រទេសសិង្ហបុរី លោក Faye បានចេញសេចក្តីសម្រេចមួយដែលបញ្ជាក់ថា លោក Sonko និងសមាជិកគណៈរដ្ឋមន្រ្តីទាំងអស់ត្រូវបានបញ្ឈប់ពីមុខតំណែងរបស់ពួកគេ។ ការសម្រេចចិត្តនេះធ្វើឡើងបន្ទាប់ពីមានភាពតានតឹងអូសបន្លាយជាច្រើនខែរវាងប្រធានាធិបតី និងនាយករដ្ឋមន្រ្តី ដោយភាគីទាំងពីរមានការខ្វែងគំនិតគ្នាយ៉ាងខ្លាំងលើគោលនយោបាយសេដ្ឋកិច្ច និងការដឹកនាំរដ្ឋ។

សារព័ត៌មាន France24 បានរាយការណ៍បន្ថែមទៀតថា ភាពតានតឹងរវាងថ្នាក់ដឹកនាំទាំងពីរមិនមែនជារឿងថ្មីឡើយ ប៉ុន្តែវាបានអូសបន្លាយជាច្រើនឆ្នាំមកហើយ ដែលឆ្លុះបញ្ចាំងពីការប្រេះឆាយ៉ាងជ្រៅនៅក្នុងសម្ព័ន្ធកាន់អំណាច។ The Straits Times ក៏បានរាយការណ៍ដែរថា ការមិនចុះសម្រុងគ្នានេះបានកើនឡើងជាបន្តបន្ទាប់ និងបានរង្គោះរង្គើដល់ស្ថិរភាពនយោបាយ។

នៅពេលជាមួយគ្នានោះ ប្រទេសសេណេហ្កាល់កំពុងប្រឈមមុខនឹងវិបត្តិសេដ្ឋកិច្ចធ្ងន់ធ្ងរ ជាពិសេសបំណុលសាធារណៈដែលមានកម្រិតខ្ពស់។ យោងតាមកាសែត The Straits Times កិច្ចចរចារវាងរដ្ឋាភិបាល និងមូលនិធិរូបិយវត្ថុអន្តរជាតិ (IMF) សម្រាប់ការទទួលបានកញ្ចប់ជំនួយហិរញ្ញវត្ថុត្រូវបានអូសបន្លាយពេលយូរ ហើយគ្មានការព្រមព្រៀងណាមួយត្រូវបានសម្រេចឡើយ។ ការផ្លាស់ប្តូរនយោបាយនេះត្រូវបានគេមើលឃើញថា អាចធ្វើឲ្យដំណើរការចរចារទាំងនេះកាន់តែស្មុគស្មាញ ហើយបង្កើនភាពមិនប្រាកដប្រជាក្នុងចំណោមវិនិយោគិន និងសហគមន៍អន្តរជាតិ។

មកទល់ពេលនេះ លោក Faye មិនទាន់បានប្រកាសតែងតាំងនាយករដ្ឋមន្រ្តីថ្មី ឬបង្កើតគណៈរដ្ឋមន្រ្តីថ្មីនៅឡើយទេ។ ការខ្វះមេដឹកនាំរដ្ឋាភិបាលនេះ អាចបង្កឲ្យមានភាពទំនេរក្នុងការសម្រេចចិត្តសំខាន់ៗ ជាពិសេសទាក់ទងនឹងការដោះស្រាយវិបត្តិសេដ្ឋកិច្ច និងការចរចាជាមួយ IMF។ គេមិនទាន់អាចដឹងបានថា តើការផ្លាស់ប្តូរលើកនេះនឹងជាដំណោះស្រាយសម្រាប់វិបត្តិ ឬវានឹងធ្វើឲ្យស្ថានការណ៍កាន់តែធ្លាក់ចុះថែមទៀតនោះទេ។