កាសែត South China Morning Post និងកាសែត The Straits Times បានរាយការណ៍ថា អាជ្ញាធរអន្តោប្រវេសន៍របស់ជប៉ុនកំពុងរៀបចំគម្រោងត្រួតពិនិត្យបណ្តាញសង្គម ដើម្បីស្វែងរកជនបរទេសដែលស្នាក់នៅហួសទិដ្ឋាការ និងពលករខុសច្បាប់។

តាមផែនការនេះ ទីភ្នាក់ងារសេវាកម្មអន្តោប្រវេសន៍នឹងប្រើប្រាស់ឧបករណ៍វិភាគទិន្នន័យ ដើម្បីកំណត់រកព័ត៌មានដែលបង្ហោះតាមអ៊ីនធឺណិត ពាក់ព័ន្ធនឹងការងារខុសច្បាប់។ ក្នុងនោះរួមមានការស្នើសុំការងារ ការផ្សាយពាណិជ្ជកម្ម ឬព័ត៌មានផ្សេងៗដែលអាចបង្ហាញពីសកម្មភាពរំលោភច្បាប់អន្តោប្រវេសន៍។

កាសែត The Straits Times បានរាយការណ៍បន្ថែមថា ជប៉ុននឹងបង្កើតអង្គភាពពិសេសមួយសម្រាប់ធ្វើការល្បាតតាមប្រព័ន្ធអ៊ីនធឺណិត ដែលនឹងជួយពង្រឹងការតាមដាន និងការអនុវត្តច្បាប់។ រីឯ South China Morning Post បានឱ្យដឹងថា វិធានការថ្មីនេះអាចនឹងចាប់ផ្តើមអនុវត្តនៅដើមឆ្នាំក្រោយ។

គម្រោងនេះធ្វើឡើងនៅពេលដែលជប៉ុនកំពុងប្រឈមនឹងកង្វះកម្លាំងពលកម្មធ្ងន់ធ្ងរ ដែលបានបង្ខំឱ្យប្រទេសនេះបើកទទួលពលករបរទេសកាន់តែច្រើន។ ប៉ុន្តែការកើនឡើងនៃចំនួនពលករបរទេស បាននាំឱ្យមានការកើនឡើងនូវករណីអ្នកស្នាក់នៅហួសទិដ្ឋាការ និងការងារខុសច្បាប់ ដែលជំរុញឱ្យរដ្ឋាភិបាលជប៉ុនពង្រឹងការត្រួតពិនិត្យ។

មន្ត្រីជប៉ុនជឿជាក់ថា ការតាមដានបណ្តាញសង្គមនឹងជាមធ្យោបាយដ៏មានប្រសិទ្ធភាព ពីព្រោះជនបរទេសជាច្រើនតែងតែប្រើប្រាស់វេទិកាទាំងនេះ ដើម្បីស្វែងរកការងារ ឬផ្សព្វផ្សាយសេវាកម្មការងារខុសច្បាប់។ ដូច្នេះ ការប្រមូលព័ត៌មានពីប្រភពទាំងនេះ នឹងជួយឱ្យអាជ្ញាធរអាចចាត់វិធានការបានទាន់ពេលវេលា។