កាលពីថ្ងៃចន្ទ ទី២៦ ខែឧសភា ឆ្នាំ ២០២៦ សារព័ត៌មាន South China Morning Post និង The Diplomat បានរាយការណ៍ថា ក្រសួងទំនាក់ទំនង និងឌីជីថលឥណ្ឌូណេស៊ីបានប្រកាសកាលពីល្ងាចថ្ងៃសុក្រសប្តាហ៍មុនថា ខ្លួនបានទប់ស្កាត់ការចូលដំណើរការគេហទំព័រ Polymarket នៅទូទាំងប្រទេស។ លោក Alexander Sabar មន្ត្រីក្រសួង បានថ្លែងថា វិធានការនេះជាផ្នែកនៃការអនុវត្តច្បាប់ប្រឆាំងល្បែងស៊ីសងតាមប្រព័ន្ធអនឡាញ ដែលរដ្ឋាភិបាលកំពុងពង្រឹង។

Polymarket គឺជាទីផ្សារព្យាករណ៍តាមអ៊ីនធឺណិត ដែលអនុញ្ញាតឲ្យអ្នកប្រើប្រាស់ធ្វើការភ្នាល់លើលទ្ធផលនៃព្រឹត្តិការណ៍ផ្សេងៗ។ ការចាត់វិធានការនេះកើតឡើងតែប៉ុន្មានថ្ងៃប៉ុណ្ណោះ បន្ទាប់ពីគេហទំព័រនេះបានដាក់បញ្ចូលសំណួរភ្នាល់មួយ ស្តីអំពីថាតើអាណត្តិប្រធានាធិបតី Prabowo Subianto អាចនឹងបញ្ចប់មុនកាលកំណត់ដែរឬទេ។

ក្នុងសេចក្តីថ្លែងការណ៍ផ្លូវការ ក្រសួងបានគូសបញ្ជាក់ថា៖ «រដ្ឋាភិបាលឥណ្ឌូណេស៊ីនឹងមិនអត់ឱនឲ្យមានល្បែងស៊ីសងតាមអ៊ីនធឺណិតក្នុងទម្រង់ណាមួយឡើយ»។ យោងតាម South China Morning Post ល្បែងស៊ីសងគ្រប់ប្រភេទនៅឥណ្ឌូណេស៊ីគឺខុសច្បាប់ ហើយអាជ្ញាធរកំពុងពង្រឹងការបង្ក្រាបការភ្នាល់តាមអនឡាញជាបន្តបន្ទាប់។

The Diplomat បានរាយការណ៍ថា ប្រទេសឥណ្ឌូណេស៊ីបានក្លាយជាប្រទេសទីពីរនៅអាស៊ីអាគ្នេយ៍ដែលបានទប់ស្កាត់វេទិកាដ៏ចម្រូងចម្រាសមួយនេះ។