កាលពីថ្ងៃទី ២៥ និង ២៦ ឧសភា ២០២៦ Bloomberg និងកាសែត The Japan Times បានរាយការណ៍ថា ជប៉ុនបានធ្លាក់ពីចំណាត់ថ្នាក់ទី២ មកទី៣ ក្នុងបញ្ជីប្រទេសម្ចាស់បំណុលធំជាងគេនៅលើពិភពលោក នៅដំណាច់ឆ្នាំ ២០២៥។ ទិន្នន័យហិរញ្ញវត្ថុដែលយោងតាមរបាយការណ៍ទាំងពីរបង្ហាញថា ចិនបានកើនឡើងក្នុងល្បឿនមួយដែលលឿនជាងជប៉ុន រហូតវ៉ាដាច់ទៅដល់ចំណាត់ថ្នាក់ទី២។

យោងតាម Bloomberg ជប៉ុនបានបង្កើនទ្រព្យសកម្មសុទ្ធនៅក្រៅប្រទេសដល់កម្រិតកំណត់ត្រាថ្មី ប៉ុន្តែកំណើននេះនៅតែមិនគ្រប់គ្រាន់ដើម្បីរក្សាតំណែងរបស់ខ្លួនឡើយ។ ឯកាសែត The Japan Times វិញបានសរសេរថា ទ្រព្យសកម្មសុទ្ធបរទេសរបស់ជប៉ុន ដែលគណនាពីទ្រព្យវិនិយោគសរុបនៅក្រៅប្រទេសដកនឹងបំណុល បានកើនដល់កម្រិតខ្ពស់បំផុតជាប្រវត្តិសាស្ត្រនៅចុងឆ្នាំ ២០២៥។ ប៉ុន្តែទោះជាយ៉ាងនេះក្តី ចំនួនសរុបដដែលរបស់ចិនបានកើនឡើងក្នុងល្បឿនកាន់តែខ្ពស់ ធ្វើឱ្យជប៉ុនត្រូវរុញចុះមកនៅចំណាត់ថ្នាក់ទី៣។

គួរជម្រាបថា ទ្រព្យសកម្មសុទ្ធបរទេសជារង្វាស់បង្ហាញពីឋានៈជាម្ចាស់បំណុលឬកូនបំណុលរបស់ប្រទេសមួយធៀបនឹងពិភពលោក។ ខណៈដែលជប៉ុនធ្លាប់កាន់ចំណាត់ថ្នាក់ទី២ កំណើនយ៉ាងឆាប់រហ័សនៃការវិនិយោគរបស់ចិននៅបរទេសបានធ្វើឱ្យចំណាត់ថ្នាក់នេះផ្លាស់ប្តូរ។

បច្ចុប្បន្ន អាល្លឺម៉ង់នៅតែឈរនៅកំពូលតារាង ជាប្រទេសម្ចាស់បំណុលធំជាងគេបំផុតក្នុងពិភពលោក តាមការរាយការណ៍របស់ Bloomberg និង The Japan Times។