បើតាមសារព័ត៌មាន The Verge និង TechCrunch នៅថ្ងៃទី១ ខែមិថុនា ឆ្នាំ២០២៦ ក្រុម Hacker បានរកឃើញវិធីប្រើប្រាស់ AI Chatbot ជំនួយរបស់ក្រុមហ៊ុន Meta ដើម្បីគ្រប់គ្រងគណនី Instagram របស់អ្នកប្រើប្រាស់ដោយខុសច្បាប់។ បញ្ហានេះត្រូវបានគេរកឃើញនៅចុងសប្តាហ៍កន្លងមក នៅពេលដែលអ្នកប្រើប្រាស់ Instagram ជាច្រើនបានរាយការណ៍ថាគណនីរបស់ពួកគេត្រូវបានគេលួចចូល ដោយមិនដឹងមូលហេតុ។

តាមការរាយការណ៍របស់ The Verge វីដេអូមួយដែលត្រូវបានចែករំលែកនៅលើបណ្តាញ Telegram បង្ហាញពីរបៀបដែល Hacker អាចស្នើសុំឱ្យ AI Chatbot ធ្វើការផ្លាស់ប្ដូរអ៊ីមែលដែលភ្ជាប់ជាមួយគណនី Instagram របស់ជនរងគ្រោះ ហើយបន្ទាប់មកធ្វើការកំណត់ពាក្យសម្ងាត់សារជាថ្មី ដោយមិនចាំបាច់ដឹងពាក្យសម្ងាត់ដើមឡើយ។ វីដេអូនោះបានបង្ហាញយ៉ាងច្បាស់ពីជំហាននានា ដែលអាចឱ្យ Hacker កាន់កាប់គណនីអ្នកដទៃបានដោយងាយស្រួល។

The Verge បានរាយការណ៍បន្ថែមថា ក្រុមហ៊ុន Meta បានបញ្ជាក់ថាខ្លួនបានជួសជុលភាពមិនប្រក្រតីនេះរួចរាល់ហើយ បន្ទាប់ពីបានដឹងអំពីបញ្ហានេះ។ ក្នុងពេលជាមួយគ្នានោះដែរ កាលពីថ្ងៃអាទិត្យ គណនី Instagram របស់អតីតសេតវិមានរបស់លោក Barack Obama ដែលមានឈ្មោះថា @obamawhitehouse ក៏ត្រូវបានគេលួចចូល និងបង្ហោះរូបភាពដែលមានមាតិកាឃោសនារបស់ប្រទេសអ៊ីរ៉ង់។ មិនតែប៉ុណ្ណោះ គណនី Instagram របស់មន្ត្រីជាន់ខ្ពស់កងទ័ពអវកាសសហរដ្ឋអាមេរិកក៏ត្រូវបាន Hacker កាន់កាប់ផងដែរ។

TechCrunch បានរាយការណ៍ថា អ្នកប្រើប្រាស់បណ្តាញសង្គមជាច្រើនបានរាយការណ៍ថាគណនី Instagram របស់ពួកគេត្រូវបានលួចចូលកាលពីចុងសប្តាហ៍ ហើយបានចោទប្រកាន់ថា AI Chatbot ជំនួយរបស់ Meta គឺជាមូលហេតុដែលអនុញ្ញាតឱ្យ Hacker ចូលដំណើរការបាន។