យោងតាមការរាយការណ៍របស់ The Verge និង NDTV ប្រធានាធិបតីសហរដ្ឋអាមេរិក លោក ដូណាល់ ត្រាំ បានចុះហត្ថលេខាលើបទបញ្ជាប្រតិបត្តិមួយនៅថ្ងៃអង្គារ ទី ២ ខែមិថុនា ដែលបង្កើតនូវ « ក្របខ័ណ្ឌស្ម័គ្រចិត្ត » សម្រាប់ឲ្យក្រុមហ៊ុនអភិវឌ្ឍន៍បញ្ញាសិប្បនិម្មិត (AI) ចែករំលែកម៉ូដែលជឿនលឿនរបស់ខ្លួន ដែលត្រូវបានគេស្គាល់ថាជា « frontier models » ទៅកាន់រដ្ឋាភិបាលសហព័ន្ធ មុនពេលម៉ូដែលទាំងនោះត្រូវបានចេញផ្សាយជាសាធារណៈ ឬដាក់លក់នៅលើទីផ្សារ។
គោលដៅនៃការចែករំលែកនេះគឺដើម្បីឲ្យរដ្ឋាភិបាលអាចវាយតម្លៃហានិភ័យសន្តិសុខ ជាពិសេសផ្នែកសន្តិសុខអ៊ីនធឺណិត ដែលអាចកើតចេញពីម៉ូដែល AI ដែលមានសមត្ថភាពខ្ពស់ មុនពេលពួកវាប៉ះពាល់ដល់ហេដ្ឋារចនាសម្ព័ន្ធសំខាន់ៗ ឬសាធារណជន។
The Verge បានរាយការណ៍បន្ថែមថា បទបញ្ជានេះបានលើកឡើងពីភាពជោគជ័យនៃឧស្សាហកម្ម AI អាមេរិក ដោយសារគោលនយោបាយបដិសេធមិនដាក់ « បទប្បញ្ញត្តិដ៏តឹងរ៉ឹងហួសហេតុ » ប៉ុន្តែក៏បានព្រមានដែរថា សមត្ថភាពថ្មីៗរបស់ AI នាំមកនូវហានិភ័យសន្តិសុខដែលមិនអាចមើលរំលងបាន។ ដូច្នេះ ទីភ្នាក់ងារសហព័ន្ធមួយចំនួនត្រូវបានដឹកនាំឲ្យរួមគ្នាបង្កើតក្របខ័ណ្ឌមួយសម្រាប់ « វាយតម្លៃសមត្ថភាពអ៊ីនធឺណិតកម្រិតខ្ពស់នៃម៉ូដែល AI » មុនពេលពួកគេអាចចេញផ្សាយបាន នេះបើតាមការដកស្រង់ខ្លឹមសារដោយ The Verge។
ទន្ទឹមនឹងនេះ លក្ខណៈស្ម័គ្រចិត្តនៃក្របខ័ណ្ឌនេះមានន័យថាក្រុមហ៊ុន AI មិនមានកាតព្វកិច្ចគតិយុត្តក្នុងការចូលរួមនោះទេ ប៉ុន្តែរដ្ឋបាលលោក ត្រាំ បានសង្កត់ធ្ងន់ថាការសហការនេះនឹងជួយ « លើកកម្ពស់ការច្នៃប្រតិដ្ឋិប្រកបដោយសុវត្ថិភាព និងពង្រឹងសន្តិសុខអ៊ីនធឺណិតនៃហេដ្ឋារចនាសម្ព័ន្ធសំខាន់ៗ » តាមការរាយការណ៍របស់ The Verge ។
NDTV ដែលជាសារព័ត៌មានឥណ្ឌា ក៏បានចុះផ្សាយព័ត៌មានដូចគ្នានេះ ដោយបានបញ្ជាក់ថា បទបញ្ជានេះបង្កើតក្របខ័ណ្ឌស្ម័គ្រចិត្តមួយ សម្រាប់ឲ្យអ្នកអភិវឌ្ឍ AI ចែករំលែកម៉ូដែលដ៏មានឥទ្ធិពលរបស់ពួកគេជាមួយរដ្ឋាភិបាល មុនពេលចេញផ្សាយជាផ្លូវការ។