Al Jazeera, Dawn និង The Straits Times បានរាយការណ៍ថា យុវជនឥណ្ឌារាប់រយនាក់ ដែលតំណាងឱ្យចលនា «គណបក្សប្រជាជនកន្លាត» (Cockroach Janta Party) បានប្រមូលផ្តុំគ្នា នៅទីក្រុងញូវដេលី កាលពីថ្ងៃទី ៦ ខែមិថុនា ឆ្នាំ ២០២៦ ដើម្បីធ្វើបាតុកម្មតាមដងផ្លូវ ជាលើកដំបូងរបស់ក្រុម។ បាតុករ ដែលភាគច្រើនជាសិស្ស-និស្សិត បានពាក់ម៉ាស់រាងកន្លាត និងកាន់ខិត្តប័ណ្ណ ហើយបានស្រែកស្លោគ ទាមទារឱ្យលោក Dharmendra Pradhan រដ្ឋមន្ត្រីក្រសួងអប់រំឥណ្ឌា លាលែងពីតំណែង។ ពួកគេបានចោទប្រកាន់ថា មានភាពមិនប្រក្រតីធ្ងន់ធ្ងរ ក្នុងការប្រឡងសំខាន់ៗរបស់ប្រទេស ដូចជាការលេចធ្លាយសំណួរ និងបញ្ហាបច្ចេកទេស។ យោងតាម Dawn បាតុករម្នាក់ឈ្មោះ Utkarsh Raj អាយុ ១៦ ឆ្នាំ បាននិយាយថា «យើងចង់បានគណនេយ្យភាពពីរដ្ឋាភិបាល តើការលេចធ្លាយសំណួរប្រឡង នៅក្នុងប្រទេសនេះកើតឡើងដោយរបៀបណា? តើវាត្រឹមត្រូវដោយរបៀបណា?»។ បាតុករម្នាក់ទៀតឈ្មោះ Sarthak អាយុ ២០ ឆ្នាំ បាននិយាយថា «ឥណ្ឌាសមនឹងទទួលបានការគ្រប់គ្រងការប្រឡងសំខាន់ៗ ឲ្យបានល្អប្រសើរជាងនេះពីរដ្ឋាភិបាល»។ កន្លែងបាតុកម្ម ត្រូវបានឃ្លាំមើលយ៉ាងយកចិត្តទុកដាក់ ដោយមន្ត្រីនគរបាល ក្នុងឯកសណ្ឋានការពារកុបកម្ម។

ចលនានេះ មានដើមកំណើតពីការលេងសើចបែបតិះដៀល ចំពោះពាក្យសម្តីរបស់ចៅក្រមម្នាក់ ក្នុងប្រទេសឥណ្ឌា ដែលបានហៅយុវជនអត់ការងារធ្វើមួយចំនួន ថាជា «កន្លាត» នេះបើតាមការរាយការណ៍របស់ The Straits Times ។ អ្នកបង្កើតចលនានេះ គឺលោក Abhijeet Dipke អាយុ ៣០ ឆ្នាំ ជាអតីតអ្នកយុទ្ធសាស្ត្រទំនាក់ទំនងនយោបាយ របស់គណបក្សប្រឆាំង Aam Aadmi Party ហើយបានបញ្ចប់ការសិក្សាពីសាកលវិទ្យាល័យបូស្តុន ក្នុងសហរដ្ឋអាមេរិក។ លោក Dipke បានធ្វើដំណើរមកពីសហរដ្ឋអាមេរិក នៅថ្ងៃសៅរ៍នេះ ហើយបានថ្លែងទៅកាន់អ្នកគាំទ្រថា «យុវជននៃប្រទេសនេះ នឹងមិនខ្លាចនរណាទៀតទេ ពួកគេនឹងតស៊ូ» នេះបើតាម Dawn និង NPR ។ លោកក៏បាននិយាយទៀតថា «កន្លាតមិនដែលភ័យខ្លាចទេ ហើយក៏មិនដែលស្លាប់ដែរ» ខណៈអ្នកគាំទ្រស្រែកតបយ៉ាងខ្លាំង។ លោក Dipke ក៏បានកាន់សៀវភៅជីវប្រវត្តិរបស់ បណ្ឌិត B. R. Ambedkar អំឡុងពេលមកដល់អាកាសយានដ្ឋានផងដែរ ដែលបង្ហាញពីការដកស្រង់និមិត្តរូប ពីចលនាយុត្តិធម៌សង្គម នេះបើតាមការរាយការណ៍របស់ Dawn ។

ក្រុមនេះ បានចាប់ផ្តើមបង្កើតនៅពាក់កណ្តាលខែឧសភា ឆ្នាំ ២០២៦ ហើយទទួលបានអ្នកតាមដានប្រមាណ ២២ លាននាក់ នៅលើបណ្តាញ Instagram ដែលធ្វើឲ្យវាក្លាយជាចលនាបញ្ចេញមតិតាមអនឡាញ ដ៏ធំបំផុត ប្រឆាំងនឹងការគ្រប់គ្រងរយៈពេល ១២ ឆ្នាំ របស់លោកនាយករដ្ឋមន្ត្រី Narendra Modi ។ មូលហេតុចម្បង នៃការខឹងសម្បាររបស់យុវជន គឺអត្រាគ្មានការងារធ្វើខ្ពស់ជាប់លាប់ និងរឿងអាស្រូវលេចធ្លាយសំណួរប្រឡង។ យោងតាម Dawn អត្រាយុវជនគ្មានការងារធ្វើ នៅតាមទីក្រុង បានឡើងដល់ជិត ១៤ ភាគរយ កាលពីខែមេសា ខណៈដែលយុវជនជាច្រើន ដែលមានការអប់រំខ្ពស់ ត្រូវបង្ខំចិត្តធ្វើការងារ ដែលមានប្រាក់ឈ្នួលទាប និងគ្មានសុវត្ថិភាពការងារ។ ឥណ្ឌាមានប្រជាជនវ័យក្មេង ជិត ៤០០ លាននាក់ ដែលមានអាយុចន្លោះពី ១៥ ដល់ ២៩ ឆ្នាំ ហើយការបង្កើតការងារក្រៅវិស័យកសិកម្ម សម្រាប់ពួកគេ នៅតែជាបញ្ហាប្រឈមដ៏ធំបំផុតមួយ។

ចំពោះវិបត្តិប្រឡងវិញ កាលពីខែឧសភា អាជ្ញាធរឥណ្ឌាបានលុបចោល ការប្រឡងចូលមហាវិទ្យាល័យវេជ្ជសាស្ត្រ ទូទាំងប្រទេស (NEET) បន្ទាប់ពីអ្នកស៊ើបអង្កេត រកឃើញការលេចធ្លាយសំណួរ។ សារព័ត៌មានឥណ្ឌា បានរាយការណ៍ពីករណីធ្វើអត្តឃាត របស់សិស្សវ័យជំទង់ជាច្រើននាក់ ក្រោយរឿងអាស្រូវនេះ។ លើសពីនេះ មានរឿងអាស្រូវមួយទៀត ដែលពាក់ព័ន្ធនឹងប្រព័ន្ធដាក់ពិន្ទុតាមអនឡាញ នៃការប្រឡង ដែលធ្វើឡើងដោយសិស្សជិត ២ លាននាក់។ បញ្ហាទាំងនេះ បានធ្វើឲ្យប្រព័ន្ធប្រឡង គ្មានភាពជឿជាក់ទាំងស្រុង ហើយគំរាមកំហែង ដល់អនាគតការងាររបស់សិស្សរាប់លាននាក់។ យោងតាម Dawn លោក Sapan Gyan អាយុ ៥២ ឆ្នាំ ដែលបាននាំកូនប្រុសរបស់គាត់ មកចូលរួមបាតុកម្ម បាននិយាយថា «យុវជនត្រូវធ្វើការប្រឡង ហើយពួកគេ មិនអាចទទួលយកស្ថានភាព ដែលប្រព័ន្ធប្រឡងទាំងនេះ គ្មានភាពជឿជាក់ទៀតទេ»។

រដ្ឋាភិបាលរបស់លោក Modi បានប្រតិកម្ម ដោយបិទគណនី X របស់ចលនានេះ នៅក្នុងប្រទេសឥណ្ឌា ហើយក្រុមបានយករឿងនេះ ទៅប្តឹងតុលាការនៅក្រុងដេលី។ រដ្ឋមន្ត្រីជាន់ខ្ពស់ Kiren Rijiju បានចោទប្រកាន់ចលនានេះ ថាបានស្វែងរកអ្នកតាមដាន ពីប្រទេសប៉ាគីស្ថាន និងពី «ក្រុមប្រឆាំងឥណ្ឌា»។ Dawn រាយការណ៍ ដោយដកស្រង់សម្តីអ្នកវិភាគនយោបាយថា ភាពល្បីល្បាញរបស់ចលនាកន្លាត បានចាប់ផ្តើមធ្វើឲ្យប៉ះពាល់ ដល់មុខមាត់របស់លោក Modi ទោះបីជាគណបក្ស Bharatiya Janata Party របស់លោក ទើបតែឈ្នះការបោះឆ្នោត នៅតាមរដ្ឋសំខាន់ៗមួយចំនួនក៏ដោយ។ កំហឹងកាន់តែខ្លាំងឡើង ចំពេលដែលតម្លៃប្រេងឥន្ធនៈឡើងថ្លៃ និងមានការខ្វះខាតឧស្ម័ន ដោយសារសង្គ្រាមនៅមជ្ឈិមបូព៌ា ហើយអ្នកវិភាគយល់ថា បញ្ហាទាំងនេះកំពុងបន្ថែមសម្ពាធ ដល់ភាពពេញនិយមរបស់រដ្ឋាភិបាលផងដែរ។