យោងតាមការរាយការណ៍របស់ The Hill និង Jamaica Observer កាលពីថ្ងៃព្រហស្បតិ៍ ទី១៨ ខែមិថុនា មជ្ឈមណ្ឌលគ្រប់គ្រងនិងបង្ការជំងឺអាហ្វ្រិក (Africa CDC) បានប្រកាសថា ការផ្ទុះឡើងនៃវីរុសអ៊ីបូឡានៅសាធារណរដ្ឋប្រជាធិបតេយ្យកុងហ្គោ បានបណ្តាលឱ្យមនុស្ស ២០២ នាក់ស្លាប់ ពីករណីបញ្ជាក់ចំនួន ៨៧៥ ករណី។

កាសែត The Hill បានបន្ថែមថា ចំនួនករណីឆ្លងសរុបបានកើនឡើង ៣៨% ក្នុងរយៈពេលតែមួយសប្តាហ៍ ហើយការផ្ទុះឡើងលើកនេះត្រូវបានចាត់ទុកថាជាការផ្ទុះឡើងដ៏អាក្រក់បំផុតនៅដំណាក់កាលដំបូង បើធៀបនឹងការផ្ទុះឡើងមុនៗ។

នៅថ្ងៃសុក្រ ទី១៩ ខែមិថុនា កាសែត The Straits Times បានរាយការណ៍ថា នៅក្នុងជំរំសម្រាប់ជនភៀសខ្លួនមួយនៅភាគឦសាននៃប្រទេសកុងហ្គោ មានមនុស្សយ៉ាងហោចណាស់ ៣០ នាក់បានស្លាប់ចាប់តាំងពីដើមខែឧសភាមក។ មន្ត្រីជំរំបានលើកឡើងថា អត្រាស្លាប់នេះមិនធ្លាប់មានពីមុន ហើយដោយផ្អែកលើរោគសញ្ញា ការស្លាប់ទាំងនេះអាចជាសញ្ញាថាវីរុសអ៊ីបូឡាកំពុងរីករាលដាលយ៉ាងឆាប់រហ័សនៅទីនោះ។

ដោយឡែក Jamaica Observer បានរាយការណ៍ថា មន្ត្រីសុខាភិបាលកំពុងជួបប្រទះការលំបាកក្នុងការតាមដានទំនាក់ទំនងអ្នកឆ្លង ដោយសារវីរុសបានរីករាលដាលទៅកាន់តំបន់ជាច្រើន។ អង្គការកាកបាទក្រហមបានព្រមានថា ការផ្ទុះឡើងនេះមិនទាន់ដល់ចំណុចកំពូលនៅឡើយទេ ដែលមានន័យថាចំនួនករណីនិងអ្នកស្លាប់អាចនឹងបន្តកើនឡើងខ្លាំងទៀត។