តាមការរាយការណ៍របស់ RFI ដំណើរទស្សនកិច្ចរបស់សម្តេចតេជោ ហ៊ុន សែន នៅទីក្រុងប៉េកាំង បានចាប់ផ្តើមពីថ្ងៃទី២៥ និងបន្តដល់ថ្ងៃទី២៧ ខែមិថុនា ឆ្នាំ២០២៦។ ក្នុងអំឡុងពេលនេះ សម្តេចបានជួបជាមួយប្រធានក្រុមហ៊ុន China Communications Construction Company (CCCC) ដែលជាក្រុមហ៊ុនចិនកំពុងទទួលបន្ទុកសាងសង់គម្រោងហេដ្ឋារចនាសម្ព័ន្ធធំៗនៅកម្ពុជា។

គណបក្សប្រជាជនកម្ពុជា និង Fresh News បានរាយការណ៍ដូចគ្នាថា នៅក្នុងជំនួបនោះ សម្តេចតេជោបានស្នើដល់ថ្នាក់ដឹកនាំ CCCC ឲ្យបន្តយកចិត្តទុកដាក់ខ្ពស់ចំពោះគម្រោងនានា ជាពិសេស ព្រែកជីកហ្វូណនតេជោ ផ្លូវល្បឿនលឿនភ្នំពេញ-បាវិត និងផ្លូវជាតិលេខ៥០C ដែលសុទ្ធសឹងជាគម្រោងអាទិភាពសម្រាប់ការអភិវឌ្ឍហេដ្ឋារចនាសម្ព័ន្ធនៅកម្ពុជា។

ដោយឡែក ក្នុងជំនួបជាមួយប្រធានាធិបតីចិន លោក ស៉ី ជីនពីង សម្តេចតេជោ ហ៊ុន សែន បានសង្កត់ធ្ងន់លើភាពរឹងមាំនៃទំនាក់ទំនងកម្ពុជា-ចិន។ Fresh News និងគេហទំព័ររបស់គណបក្សប្រជាជន បានដកស្រង់ប្រសាសន៍របស់សម្តេចថាៈ «ទោះបីពិភពលោក និងអាកាសធាតុប្រែប្រួលក្តី តែមិត្តភាពរវាងកម្ពុជា និងចិន មិនប្រែប្រួលឡើយ»។

ដំណើរទស្សនកិច្ចរបស់សម្តេចតេជោនៅចិននេះ ត្រូវបាន Fresh News ចាត់ទុកថាជាកម្លាំងជំរុញថ្មីសម្រាប់ការពង្រឹង និងពង្រីកទំនាក់ទំនងទ្វេភាគី ព្រមទាំងជាការបន្តវេនមិត្តភាពជាប្រវត្តិសាស្ត្ររវាងប្រជាជាតិទាំងពីរ។