ភ្នំពេញៈ ប្រទេសកម្ពុជាបានទទួលចំណាត់ថ្នាក់លេខ១ពិភពលោក ជាប្រទេសដែលគ្រប់គ្រង និងប្រើប្រាស់ដីធ្លី និងធនធានធម្មជាតិប្រកបដោយនិរន្តរភាព ឆ្នាំ២០២៦ នេះបើយោងតាមការវាយតម្លៃចុងក្រោយរបស់ទស្សនាវដ្តី U.S. News & World Report នៃសហរដ្ឋអាមេរិក។ តាមការរាយការណ៍របស់សារព័ត៌មានភ្នំពេញប៉ុស្តិ៍ ចំណាត់ថ្នាក់នេះត្រូវបានធ្វើឡើងនៅក្នុងខែមិថុនា ហើយត្រូវបានផ្សព្វផ្សាយតាមរយៈបណ្តាញព័ត៌មាន SEA Infographics។

ចំណាត់ថ្នាក់នេះត្រូវបានកំណត់ដោយផ្អែកលើសូចនាករជាច្រើន ដែលផ្តោតលើការគ្រប់គ្រងធនធានធម្មជាតិប្រកបដោយនិរន្តរភាព។ តាមសារព័ត៌មានភ្នំពេញប៉ុស្តិ៍ ក្នុងចំណោមសូចនាករសំខាន់ៗមានដូចជា សមត្ថភាពក្នុងការទប់ស្កាត់ការបាត់បង់ព្រៃឈើ ការការពារជីវៈចម្រុះនៅក្នុងតំបន់ការពារធម្មជាតិ ដែលគ្របដណ្តប់ប្រមាណ ៤១% នៃទំហំដីសរុបរបស់ប្រទេស។ ម៉្យាងទៀត កម្ពុជាក៏ទទួលបានពិន្ទុខ្ពស់លើការគ្រប់គ្រងគុណភាពខ្យល់ ប្រភពទឹក និងដីធ្លី ព្រមទាំងការរក្សាកម្រិតបញ្ចេញឧស្ម័នកាបូនទាបតាមរយៈយុទ្ធសាស្ត្រដាំកូនឈើផងដែរ។ កត្តារួមផ្សំទាំងនេះជំរុញឱ្យកម្ពុជាទទួលបានចំណាត់ថ្នាក់កំពូលលើពិភពលោក។

បើគិតជាសកល កម្ពុជានាំមុខស្លូវេនី (លេខ២) និងប៉ារ៉ាហ្គាយ (លេខ៣)។ ដោយឡែក នៅក្នុងតំបន់អាស៊ីអាគ្នេយ៍ កម្ពុជាឈរលើគេបង្អស់ ដោយមានឡាវ (លេខ២) និងមីយ៉ាន់ម៉ា (លេខ៣) ស្ថិតនៅលំដាប់បន្ទាប់។ សារព័ត៌មាន Khmer Times បានរាយការណ៍ដោយផ្អែកលើសេចក្តីប្រកាសរបស់ក្រសួងបរិស្ថានថា ក្រសួងបានសម្តែងការសប្បាយរីករាយ និងចាត់ទុកចំណាត់ថ្នាក់នេះជាកិត្តិយសជាតិ ដែលឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលក្នុងការអភិរក្សបរិស្ថាន។

គួររំឭកផងដែរថា កាលពីខែឧសភាកន្លងមក កម្ពុជាក៏ធ្លាប់ទទួលបានការទទួលស្គាល់ជាវិជ្ជមានពីស្ថាប័នអន្តរជាតិនានាលើវិស័យបរិស្ថានដែរ តាមការចុះផ្សាយរបស់ភ្នំពេញប៉ុស្តិ៍។

ជាមួយគ្នានេះ គណបក្សប្រជាជនកម្ពុជាក៏បានចេញសេចក្តីអបអរសាទរភ្លាមៗ តាមរយៈគេហទំព័រផ្លូវការរបស់ខ្លួន ដោយបានគូសបញ្ជាក់ថា លទ្ធផលដ៏អស្ចារ្យនេះ គឺជាផ្លែផ្កានៃការដឹកនាំប្រកបដោយគតិភាព និងការអនុវត្តគោលនយោបាយប្រកបដោយប្រសិទ្ធភាព។