នៅថ្ងៃទី២៧ ខែមិថុនា Anadolu Agency បានរាយការណ៍ថា អាជ្ញាធរបារាំងបានកាត់បន្ថយការព្រមានកម្រិតក្រហមដោយសាររលកកម្តៅមកនៅសល់ត្រឹម ៣៧ នាយកដ្ឋាន ដោយការព្រមានទាំងអស់រំពឹងថានឹងត្រូវបានដកចេញនៅល្ងាចថ្ងៃអាទិត្យ។ ប៉ុន្តែទោះជាយ៉ាងណា មន្ទីរពេទ្យនៅតែប្រឈមនឹងសម្ពាធយ៉ាងខ្លាំង តាមការរាយការណ៍របស់ France 24 ជាពិសេសក្នុងរយៈពេល ២៤ ម៉ោងចុងក្រោយរវាងថ្ងៃពុធ និងថ្ងៃព្រហស្បតិ៍ ដែលនាយកដ្ឋានសង្គ្រោះបន្ទាន់បានកត់ត្រាការកើនឡើងយ៉ាងគំហុកនៃករណីបញ្ហាសុខភាពទាក់ទងនឹងកម្តៅ។ តំបន់ប៉ារីសក៏បានដំណើរការផែនការសង្គ្រោះបន្ទាន់សម្រាប់មន្ទីរពេទ្យផងដែរ ដូចដែល France 24 បានរាយការណ៍ ខណៈរលកកម្តៅដែលបានវាយប្រហារបារាំងអស់រយៈពេល ៧ ថ្ងៃកំពុងរំកិលខ្លួនទៅទិសខាងកើត។

រដ្ឋាភិបាលបារាំងកំពុងប្រឈមនឹងការរិះគន់ចំពោះការឆ្លើយតបរយៈពេលវែងចំពោះរលកកម្តៅដែលបណ្តាលមកពីការប្រែប្រួលអាកាសធាតុ តាមការរាយការណ៍របស់ France 24។ ក្នុងចំណោមបញ្ហាដែលត្រូវបានលើកឡើងរួមមាន ការបិទសាលារៀន និងកង្វះម៉ាស៊ីនត្រជាក់នៅតាមមន្ទីរពេទ្យ និងមណ្ឌលថែទាំចាស់ជរា ដែលបង្ហាញពីភាពទន់ខ្សោយនៃហេដ្ឋារចនាសម្ព័ន្ធសុខាភិបាល។

ឥទ្ធិពលនៃកម្តៅក៏បានជះឥទ្ធិពលដល់ជីវិតប្រចាំថ្ងៃរបស់ប្រជាពលរដ្ឋផងដែរ។ កាសែត The Straits Times បានរាយការណ៍ថា ប្រជាជននៅទីក្រុងប៉ារីសជាច្រើនបានសម្រុកទៅស្នាក់នៅសណ្ឋាគារ ដើម្បីទាញយកប្រយោជន៍ពីម៉ាស៊ីនត្រជាក់ និងអាងហែលទឹក ដោយសារអាផាតមិនរបស់ពួកគេភាគច្រើនគ្មានម៉ាស៊ីនត្រជាក់។ ទន្ទឹមនឹងនេះ ERR News របស់អេស្តូនីបានដកស្រង់សម្តីរបស់លោកស្រីម៉ារីណា ឡៃគឺយូអេ (Marina Laikjõe) ដែលជាមគ្គុទេ្ទសក៍ទេសចរណ៍នៅប៉ារីស ដោយលោកស្រីបញ្ជាក់ថា រលកកម្តៅបានធ្វើឲ្យជីវិតប្រចាំថ្ងៃ និងវិស័យទេសចរណ៍មានការលំបាកយ៉ាងខ្លាំង ហើយការព្រួយបារម្ភធំបំផុតគឺខែក្តៅបំផុតនៅខាងមុខមិនទាន់បានចាប់ផ្តើមនៅឡើយ។

ដោយឡែក លោកវេជ្ជបណ្ឌិតប៉ាស្កាល់ អង់ដ្រេ (Pascal André) គ្រូពេទ្យសង្គ្រោះបន្ទាន់ និងជំនាញជំងឺឆ្លងនៅប្រទេសបារាំង បានប្រាប់ France 24 ថា ស្ថានភាពនេះបញ្ជាក់ពីតម្រូវការបន្ទាន់សម្រាប់កិច្ចសហការកាន់តែរឹងមាំរវាងស្ថាប័ននានា កំណែទម្រង់បុគ្គលិកសុខាភិបាល ការកែលម្អហេដ្ឋារចនាសម្ព័ន្ធ និងការវិនិយោគបន្ថែមពីរដ្ឋាភិបាល ដើម្បីត្រៀមខ្លួនទប់ទល់នឹងផលប៉ះពាល់នៃរលកកម្តៅដែលនឹងកើនឡើងនាពេលអនាគត។