សារព័ត៌មាន The Verge និង Al Jazeera បានរាយការណ៍ថា តាមចំណាត់ថ្នាក់ TOP500 ចុងក្រោយនេះ កុំព្យូទ័រទំនើប LineShine របស់ចិន បានឡើងជាកុំព្យូទ័រលឿនបំផុតនៅលើពិភពលោក។ វាបានវ៉ាដាច់កុំព្យូទ័រ El Capitan របស់សហរដ្ឋអាមេរិក ដែលពីមុនស្ថិតនៅចំណាត់ថ្នាក់លេខ១។

The Verge ក៏បានបន្ថែមថា នេះជាលើកដំបូងចាប់តាំងពីឆ្នាំ២០១៨ ដែលចិនអាចដណ្តើមតំណែងកំពូលនេះមកវិញ។ ជោគជ័យនេះកើតឡើងបើទោះបីជាសហរដ្ឋអាមេរិកបានដាក់កំហិតយ៉ាងតឹងរ៉ឹងលើការនាំចេញគ្រឿងបន្លាស់កុំព្យូទ័រសមត្ថភាពខ្ពស់ទៅកាន់ប្រទេសចិនក៏ដោយ។ ប្រព័ន្ធ LineShine នេះត្រូវបានដំឡើងនៅមជ្ឈមណ្ឌលជាតិសម្រាប់កុំព្យូទ័រទំនើប ក្នុងទីក្រុង Shenzhen ។

គួរកត់សម្គាល់មួយទៀតថា កុំព្យូទ័រ LineShine មិនប្រើប្រាស់បន្ទះដំណើរការក្រាហ្វិក (GPU) ដែលជាសមាសធាតុស្នូលសម្រាប់កុំព្យូទ័រទំនើបភាគច្រើននោះទេ តាមការរាយការណ៍របស់ The Verge ។ ទន្ទឹមនឹងនេះ ទោះបីចិនឡើងកំពូលក៏ដោយ ក្រុមហ៊ុនមកពីសហរដ្ឋអាមេរិកនៅតែកាន់កាប់កុំព្យូទ័រ ៣ ក្នុងចំណោម ៥ គ្រឿងដែលនៅកំពូលតារាង។

The Verge បានវិភាគទៀតថា ការឡើងដល់កំពូលនេះមិនត្រឹមតែជាសមិទ្ធផលផ្នែកបច្ចេកទេសប៉ុណ្ណោះទេ ប៉ុន្តែក៏ត្រូវបានគេមើលឃើញថាជាសារពីរដ្ឋាភិបាលចិនឆ្ពោះទៅកាន់សហរដ្ឋអាមេរិកផងដែរ ក្នុងពេលដែលការប្រជែងផ្នែកបច្ចេកវិទ្យារវាងមហាអំណាចទាំងពីរកំពុងកើនឡើង។

ដោយឡែក សារព័ត៌មាន AsiaOne បានរាយការណ៍ថា ការប្រកួតប្រជែងដណ្តើមកុំព្យូទ័រលឿនបំផុតនេះ មិនបានផ្តោតសំខាន់ទៅលើការងារទាក់ទងនឹងបញ្ញាសិប្បនិម្មិត (AI) ឡើយ ដែលជាវិស័យដ៏កំពុងរីកចម្រើនមួយ។