តាមការរាយការណ៍របស់ BBC, កាសែត The Straits Times និង The Hindu ប្រជាជនអាមេរិកចន្លោះពី ១៦០ ទៅ ១៨៥ លាននាក់ កំពុងស្ថិតក្រោមការព្រមានពីកម្ដៅគ្រោះថ្នាក់។ រលកកម្ដៅដែលបណ្ដាលមកពីដោមកម្ដៅ (heat dome) បានគ្របដណ្ដប់តំបន់ភាគខាងកើត និងកណ្ដាលសហរដ្ឋអាមេរិក ហើយបានធ្វើឲ្យសីតុណ្ហភាពឡើងដល់ ៣៨ អង្សាសេ (១០០F) រយៈពេលជាច្រើនថ្ងៃ។ សន្ទស្សន៍កម្ដៅ (heat index) អាចឡើងហួស ៤៣ អង្សាសេ (១១០F) ជាពិសេសនៅទីក្រុងវ៉ាស៊ីនតោនឌីស៊ី។ សេវាកម្មឧតុនិយមជាតិបានចេញការព្រមានសម្រាប់រដ្ឋចំនួន ២៣ និងបានព្រមានពីគ្រោះថ្នាក់ដល់សុខភាពសាធារណៈ។ រលកកម្ដៅនេះត្រូវបានព្យាករថានឹងបន្តរហូតដល់ចុងសប្ដាហ៍។

ដោយសារតែកម្ដៅខ្លាំង មន្ត្រីនៅរដ្ឋធានីវ៉ាស៊ីនតោនឌីស៊ីបានប្រកាសលុបចោលក្បួនដង្ហែទិវាឯករាជ្យ ដែលគ្រោងធ្វើនៅព្រឹកថ្ងៃទី ៤ កក្កដា វេលាម៉ោង ១០:៣០ ព្រឹក នេះបើយោងតាម Bloomberg និង The Straits Times។ មិនត្រឹមតែក្បួនដង្ហែប៉ុណ្ណោះទេ ព្រឹត្តិការណ៍ជាច្រើនផ្សេងទៀត ដូចជាការប្រគំតន្ត្រី និងការបាញ់កាំជ្រួចនៅតាមទីក្រុងនានា ក៏ត្រូវបានពន្យារពេល ឬលុបចោលដែរ តាមការផ្សាយរបស់ DW និងកាសែត South China Morning Post។ ក្នុងចំណោមព្រឹត្តិការណ៍ដែលរងផលប៉ះពាល់ គឺពិព័រណ៍រដ្ឋអាមេរិកដ៏អស្ចារ្យ (Great American State Fair) ដែលជាកម្មវិធីស្នូលនៃការអបអរខួប ២៥០ ឆ្នាំឯករាជ្យ របស់លោកប្រធានាធិបតីដូណាល់ ត្រាំ។ គេហទំព័រ The Hill បានរាយការណ៍ថា ពិព័រណ៍នេះត្រូវបានបិទទ្វារជាបណ្ដោះអាសន្ននៅរសៀលថ្ងៃសុក្រ ដោយសីតុណ្ហភាពឡើងដល់ ៣៨.៩ អង្សាសេ ហើយសន្ទស្សន៍កម្ដៅលើស ៤៣ អង្សាសេ។ អ្នករៀបចំបានបញ្ជាក់ថា សុវត្ថិភាពរបស់ភ្ញៀវ អ្នកស្ម័គ្រចិត្ត និងបុគ្គលិក គឺជាអាទិភាពខ្ពស់បំផុត។

ទោះបីជាមានការលុបចោល និងការពន្យារពេលជាច្រើនក៏ដោយ កម្មវិធីបាញ់កាំជ្រួចបំបែកកំណត់ត្រា «Salute to America Celebration & Fireworks» ដែលគ្រោងធ្វើនៅល្ងាចថ្ងៃសៅរ៍ នឹងនៅតែប្រព្រឹត្តទៅដែរ។ តាមការចុះផ្សាយរបស់ The Hill ព្រឹត្តិការណ៍នេះរួមមានការហោះហើរបង្ហាញរបស់យន្តហោះយោធារយៈពេលជាង ៧ ម៉ោង និងសុន្ទរកថារបស់លោកត្រាំ។ ប៉ុន្តែការចូលទៅក្នុងទីលាន National Mall ត្រូវបានពន្យារពេល ដោយសារកម្ដៅខ្លាំង ហើយលោកត្រាំបានបញ្ជាក់ថា លោកនឹងនៅតែថ្លែងសុន្ទរកថាដ៏វែង ទោះបីការព្យាករណ៍ថាសីតុណ្ហភាពអាចឡើងដល់ ៤១.៧ អង្សាសេក៏ដោយ។ មន្ត្រីគណៈកម្មការ Freedom 250 បានរាយការណ៍ថា មានមនុស្សប្រមាណ ២០ ម៉ឺននាក់បានទៅទស្សនាពិព័រណ៍រដ្ឋ និង FIFA Fan Fest កន្លងមក ហើយរំពឹងថាចំនួននេះនឹងកើនឡើង។

រលកកម្ដៅនេះមិនត្រឹមតែរំខានដល់ព្រឹត្តិការណ៍នានាប៉ុណ្ណោះទេ ប៉ុន្តែថែមទាំដាក់សម្ពាធលើបណ្ដាញអគ្គិសនី និងការធ្វើដំណើរផងដែរ។ Bloomberg បានរាយការណ៍ថា តម្រូវការអគ្គិសនីបានឡើងដល់កម្រិតកំណត់ត្រាថ្មី ហើយព្យុះផ្គររន្ទះគ្រោះថ្នាក់អាចបង្កើតឡើងនៅចុងសប្ដាហ៍នេះ។ កាសែត South China Morning Post ក៏បានកត់សម្គាល់ថា ការប្រើប្រាស់ម៉ាស៊ីនត្រជាក់ខ្លាំងកំពុងបង្កភាពតានតឹងដល់ប្រព័ន្ធថាមពល។ NBC News បានរាយការណ៍ថា ការធ្វើដំណើរតាមជើងហោះហើរ និងផ្លូវគោករបស់ប្រជាជនរាប់លាននាក់ក៏ត្រូវបានរំខានយ៉ាងដំណំ។