តាមការរាយការណ៍របស់ Dawn និង SCMP នៅថ្ងៃទី ៥ កក្កដា ប្រទេសឥណ្ឌាដែលជាអ្នកនាំចូលប្រេងធំជាងគេទី៣ និងអ្នកទិញ LPG ធំទី២ បានរងវិបត្តិផ្គត់ផ្គង់ថាមពលធ្ងន់ធ្ងរបំផុតក្នុងរយៈពេលជាច្រើនទសវត្សរ៍ ដោយសារការរាំងស្ទះច្រកសមុទ្រហូមូសអំឡុងសង្គ្រាមរវាងសហរដ្ឋអាមេរិក និងអ៊ីរ៉ង់។

តាម Dawn ទោះបីមានកិច្ចព្រមព្រៀងបណ្តោះអាសន្នដើម្បីបញ្ឈប់អរិភាព ដែលបើកផ្លូវឱ្យការដឹកជញ្ជូនប្រេងនិងឧស្ម័នដំណើរការឡើងវិញក៏ដោយ ក៏រដ្ឋមន្ត្រីប្រេងនិងឧស្ម័នធម្មជាតិឥណ្ឌាលោក Hardeep Singh Puri បានថ្លែងថា វិបត្តិនេះបានផ្តល់កម្លាំងចលករថ្មីដល់ការពង្រីកការផ្គត់ផ្គង់ក្នុងស្រុក។ លោកបានបន្ថែមថា ឥណ្ឌាកំពុងរៀបចំដេញថ្លៃតំបន់មិនទាន់រុករកទំហំ ២៥០ ០០០ គីឡូម៉ែត្រការ៉េ។

បច្ចុប្បន្នឥណ្ឌាផលិតប្រេងឆៅក្នុងស្រុកបានត្រឹមប្រហែល ១០% នៃតម្រូវការសរុប ដោយពឹងពាក់លើការនាំចូលយ៉ាងខ្លាំង។ តាម Dawn រដ្ឋាភិបាលកំពុងផ្តោតលើការរុករកអាងទឹកជ្រៅនៅសមុទ្រ Andaman និងដាក់ចេញបេសកកម្ម “Samudra Manthan” តាំងពីខែសីហា ឆ្នាំ ២០២៥ ក្រោមការដឹកនាំរបស់នាយករដ្ឋមន្ត្រី Narendra Modi។ ឥណ្ឌាក៏កំពុងសហការជាមួយក្រុមហ៊ុនធំៗដូចជា Petrobras និង BP ហើយបានបែងចែកថវិកា ១០ ពាន់លានដុល្លារសម្រាប់កម្មវិធីរុករកនេះ។

តាម Dawn ដើម្បីទប់ទល់នឹងវិបត្តិ ឥណ្ឌាបានពង្រីកប្រទេសផ្គត់ផ្គង់ប្រេងពី ២៧ ទៅ ៤១ ប្រទេស រួមមានអ៊ីរ៉ង់ វេណេស៊ុយអេឡា និងរុស្ស៊ី។ ការទិញប្រេងពីរុស្ស៊ីត្រូវបានរិះគន់ដោយសហរដ្ឋអាមេរិក និងអឺរ៉ុប ប៉ុន្តែលោក Puri បានហៅវាថាជា “វិធីសាស្ត្រជាក់ស្តែង” ដែលដាក់តម្រូវការថាមពលលើសពីការពិចារណាមនោគមវិជ្ជា។ ស្របពេលនោះ តាមការរាយការណ៍របស់ Times of India វិស័យជីឥណ្ឌានៅតែរឹងមាំ ដោយនាវា ១៥ គ្រឿងដឹកជញ្ជូនអ៊ុយរ៉េ DAP និងស្ពាន់ធ័របានឆ្លងកាត់ច្រកហូមូសដោយជោគជ័យ ហើយផលិតកម្មជីក្នុងស្រុកលើសគោលដៅ ដោយស្តុកគ្របដណ្តប់ជាង ៥១% នៃតម្រូវការប្រចាំឆ្នាំ។

តាម Dawn ទន្ទឹមនឹងនេះ តម្រូវការប្រេងឥណ្ឌាកំពុងកើនឡើងយ៉ាងឆាប់រហ័ស ពី ៥ លានបារ៉ែលក្នុងមួយថ្ងៃក្នុងឆ្នាំ ២០២១ ដល់ ៥.៦ លានបារ៉ែលបច្ចុប្បន្ន ហើយរំពឹងថានឹងឈានដល់ ៦ លានបារ៉ែលក្នុងពេលឆាប់ៗ។ លោក Puri បានបញ្ជាក់ថា លោកមានសុទិដ្ឋិនិយមខ្លាំងចំពោះអនាគត បើទោះបីដំណើរការរុករកជាកិច្ចការដែលត្រូវការទុនខ្ពស់ និងពេលវេលាយូរក៏ដោយ៕