ភ្នំពេញ — នៅថ្ងៃពុធ ទី២៤ ខែកក្កដា ឆ្នាំ២០២៦ ព្រះករុណា ព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យ លើកលែងទោសបន្ថែម ដល់លោក កឹម សុខា អតីតមេដឹកនាំគណបក្សសង្គ្រោះជាតិ។ ព្រះរាជក្រឹត្យនេះ បើកផ្លូវឱ្យលោក កឹម សុខា អាចធ្វើដំណើរចាកចេញពីដែនដីកម្ពុជាបាន ដោយត្រូវបានដកការហាមឃាត់ចំពោះការចាកចេញនេះ ដែលមានរយៈពេល ៥ឆ្នាំ តាមសាលដីការបស់សាលាឧទ្ធរណ៍ភ្នំពេញ។ ដំណឹងនេះ ត្រូវបានចុះផ្សាយដោយ DAP News និង Fresh News នៅថ្ងៃដដែល។

យោងតាមព្រះរាជក្រឹត្យលេខ នស/រកត/០៧២៦/៧៣៣ ដែល DAP News បានដកស្រង់ មាត្រា១ បានត្រាស់បង្គាប់ថា៖ «លើកលែងទោសចំពោះទោសបន្ថែម ឱ្យឈ្មោះ កឹម សុខា ភេទប្រុស កើតឆ្នាំ១៩៥៣ ត្រង់ចំណុចការហាមឃាត់ ចំពោះការចាកចេញពីដែនដី នៃព្រះរាជាណាចក្រកម្ពុជា សម្រាប់រយៈពេល៥ឆ្នាំ»។ ការហាមឃាត់នេះ ត្រូវបានកំណត់ដោយសាលដីកាព្រហ្មទណ្ឌស្ថាពរ លេខ ៧៩០ ក្រXI «អ.ណ» ចុះថ្ងៃទី៣០ ខែមេសា ឆ្នាំ២០២៦ របស់សាលាឧទ្ធរណ៍ភ្នំពេញ។

មាត្រា២ នៃព្រះរាជក្រឹត្យដដែល បានបញ្ជាក់យ៉ាងច្បាស់ថា ការលើកលែងទោសនេះ មិនអនុវត្តចំពោះទោសបន្ថែមផ្សេងទៀតឡើយ។ ដូច្នេះ លោក កឹម សុខា នៅតែជាប់ក្រោមទោសបន្ថែមផ្សេងទៀត ដែលត្រូវបានតុលាការសម្រេច លើកលែងតែការធ្វើដំណើរក្រៅប្រទេសប៉ុណ្ណោះ។

ជាចុងក្រោយ មាត្រា៣ បានត្រាស់បង្គាប់ឱ្យសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ទទួលបន្ទុកអនុវត្តព្រះរាជក្រឹត្យនេះ ចាប់ពីថ្ងៃឡាយព្រះហស្តលេខាតទៅ។ នេះបើតាមការរាយការណ៍ពី Fresh News ដែលក៏បានចុះផ្សាយព័ត៌មានស្រដៀងគ្នា ដោយបញ្ជាក់ថា ព្រះរាជក្រឹត្យនេះ បើកផ្លូវឱ្យលោក កឹម សុខា ធ្វើដំណើរទៅក្រៅប្រទេសបានភ្លាមៗ។