តូក្យូ៖ ប្រទេសជប៉ុនកំពុងធ្វើកំណែទម្រង់សន្តិសុខដ៏ធំ ដោយរួមមានផែនការបង្កើតការិយាល័យថ្មីក្រោមក្រសួងការពារជាតិ និងការកសាងទីភ្នាក់ងារស៊ើបការណ៍ទំនើបដំបូងគេចាប់តាំងពីសង្គ្រាមលោកលើកទី២មក នេះបើយោងតាមរបាយការពីសារព័ត៌មានអន្តរជាតិនានា។

តាមការរាយការណ៍របស់ South China Morning Post ក្រសួងការពារជាតិជប៉ុនគ្រោងបង្កើតការិយាល័យថ្មីមួយ ដើម្បីគ្រប់គ្រងកិច្ចសម្របសម្រួលអន្តរជាតិជាមួយបណ្តាប្រទេសដែលមានទស្សនៈដូចគ្នា។ នេះជាការិយាល័យថ្មីដំបូងរបស់ក្រសួងនេះចាប់តាំងពីឆ្នាំ២០០៧មក ហើយជាផ្នែកមួយនៃគោលនយោបាយរបស់តូក្យូក្នុងការពង្រឹងការទប់ស្កាត់ឥទ្ធិពលចិន។

ទន្ទឹមនឹងនេះ កាសែត Washington Post បានរាយការណ៍ថា ជប៉ុនកំពុងត្រៀមបង្កើតទីភ្នាក់ងារស៊ើបការណ៍ថ្មីមួយដែលត្រូវបានចាត់ទុកថាជាកំណែទម្រង់ការស៊ើបការណ៍ធំបំផុតចាប់តាំងពីសម័យក្រោយសង្គ្រាមលោកលើកទី២។ យោងតាមរបាយការណ៍នេះ ប្រធានាធិបតី Donald Trump របស់សហរដ្ឋអាមេរិក បានជំរុញឲ្យជប៉ុនមានភាពខ្លួនទីពឹងខ្លួនផ្នែកការពារជាតិ ដែលស្របទៅនឹងបំណងយូរអង្វែងរបស់ក្រុមអភិរក្សនិយមនៅតូក្យូ។ NDTV ក៏បានដកស្រង់សេចក្តីរាយការណ៍នេះ ដោយបញ្ជាក់ថា ចិនជាមូលហេតុធំមួយនៅពីក្រោយគម្រោងទាំងនេះ។

អ្នកវិភាគដែលត្រូវបានដកស្រង់ដោយ SCMP បានលើកឡើងថា កំណែទម្រង់ទាំងនេះគឺជាផ្នែកនៃយុទ្ធសាស្ត្រការពារជាតិរបស់ជប៉ុន ដើម្បីបង្កើនសមត្ថភាពទប់ទល់នឹងចិន ហើយក៏ជាការឆ្លើយតបនឹងសម្ពាធពីសម្ព័ន្ធមិត្តសំខាន់ផងដែរ។ របាយការណ៍ទាំងនេះបញ្ជាក់ថា ចលនានេះកើតឡើងចំពេលដែលភាពតានតឹងក្នុងតំបន់កំពុងកើនឡើង។