យោងតាមវិទ្យុបារាំងអន្តរជាតិ (RFI) អ្នករត់ប្រណាំងសរុបចំនួន ៦ ៧០០នាក់ មកពី ៥០ប្រទេស បានចូលរួមនៅក្នុងព្រឹត្តិការណ៍ឆ្នាំនេះ។ ខណៈនោះ Khmer Times បានរាយការណ៍ថា មានអ្នកចូលរួមចំនួន ៦ ៥០០នាក់ មកពី ៥១ប្រទេស។ ព្រឹត្តិការណ៍នេះរួមមានវិញ្ញាសារត់ចំនួន ៤ គឺ ម៉ារ៉ាតុងចម្ងាយ ៤២គីឡូម៉ែត្រ ពាក់កណ្តាលម៉ារ៉ាតុង ២១គីឡូម៉ែត្រ រត់ ១០គីឡូម៉ែត្រ និង ៣គីឡូម៉ែត្រ។ គណៈកម្មាធិការជាតិអូឡាំពិកកម្ពុជា (NOCC) បានឱ្យដឹងថា អ្នកចូលរួមឆ្នាំនេះកើនឡើងជាង ២៥% បើធៀបនឹងឆ្នាំ២០២៥ នេះបើតាមការរាយការណ៍របស់ RFI ។

ក្នុងពិធីបើក មានវត្តមានឯកអគ្គរដ្ឋទូតចិនប្រចាំកម្ពុជា លោក វ៉ាង វេនប៊ីន រដ្ឋមន្ត្រីក្រសួងទេសចរណ៍ លោក ហួត ហាក់ និងមន្ត្រីកីឡាជាន់ខ្ពស់ជាច្រើន។ RFI ក៏បានដកស្រង់សាររបស់លោកវ៉ាង វេនប៊ីនលើបណ្តាញសង្គមថា ចំនួនអ្នករត់សរុបលើសពី ៦ ៧០០នាក់ ដែលជាកំណត់ត្រាខ្ពស់បំផុតមិនធ្លាប់មាន។ អ្នកចូលរួមមកពីប្រទេសចិនមានជាង ២០០នាក់ ធ្វើឱ្យចិនក្លាយជាប្រទេសដែលមានអត្តពលិកចូលរួមច្រើនជាងគេទី២ បន្ទាប់ពីម្ចាស់ផ្ទះកម្ពុជា។

លោក វ៉ាត់ ចំរេីន អគ្គលេខាធិការ NOCC បានថ្លែងប្រាប់ RFI ថា ព្រឹត្តិការណ៍នេះផ្តល់អត្ថប្រយោជន៍សំខាន់ៗដល់កម្ពុជា រួមមាន ការផ្សព្វផ្សាយតំបន់បេតិកភណ្ឌអង្គរទៅកាន់ពិភពលោក ការបង្កើនចំណូលសេដ្ឋកិច្ច ការពង្រឹងទំនាក់ទំនងប្រជាជន និងការបង្ហាញពីសុខមាលភាពសាធារណៈ។ ព្រឹត្តិការណ៍នេះរៀបចំឡើងដោយសហការរវាង NOCC និងកិច្ចសហប្រតិបត្តិការមេគង្គ-ឡានឆាង។