South China Morning Post និង The Japan Times បានរាយការណ៍ថា អាជ្ញាធរវៀតណាមបានបង្ក្រាបបណ្តាញរត់ពន្ធពេជ្រមួយដែលត្រូវបានគេចាត់ទុកថាជាបណ្តាញធំបំផុតមិនធ្លាប់មាននៅក្នុងប្រវត្តិសាស្ត្រប្រទេសនេះ។ អ្នកស៊ើបអង្កេតអះអាងថា មានពេជ្រជាង ៣ ម៉ឺនគ្រាប់ (ប្រមាណ ៣០,០០០ គ្រាប់) ដែលមានតម្លៃសរុបជាង ១,៥ ពាន់ប៊ីលានដុង (ស្មើនឹង ៥៧ លានដុល្លារអាមេរិក) ត្រូវបាននាំចូលប្រទេសខុសច្បាប់ក្នុងរយៈពេល ២ ឆ្នាំកន្លងមកនេះ។ ការបង្ហាញខ្លួននៃបណ្តាញរត់ពន្ធដ៏ធំនេះបានធ្វើឱ្យមានការភ្ញាក់ផ្អើលពាសពេញឧស្សាហកម្មត្បូង និងសាធារណៈជនទូទៅ។

South China Morning Post បានពិពណ៌នាបន្ថែមថា តំបន់លក់គ្រឿងអលង្ការដ៏រស់រវើកនៅទីក្រុងហូជីមិញបានធ្លាក់ចុះស្ងាត់ជ្រងំមិនធ្លាប់មានពីមុន។ ទីផ្សារនេះធ្លាប់មានភាពអ៊ូអរជាប្រចាំ ប៉ុន្តែឥឡូវនេះបានផ្លាស់ប្តូរជាក់ស្តែង។ អតិថិជនលែងដើរទិញចិញ្ចៀនភ្ជាប់ពាក្យ ឬគ្រឿងអលង្ការថ្មីៗទៀតហើយ ផ្ទុយទៅវិញពួកគេកំពុងកាន់វិក័យប័ត្រចាស់ៗ និងវិញ្ញាបនបត្រ ដោយសង្ឃឹមថាអាចលក់ពេជ្រដែលខ្លួនលែងទុកចិត្តនោះបានវិញ។

The Straits Times បានរាយការណ៍ផងដែរថា អាជ្ញាធរកំពុងបន្តការស៊ើបអង្កេតដើម្បីកំណត់ថាតើពេជ្រខុសច្បាប់ទាំងនេះបានរីករាលដាលដល់ទីផ្សារកម្រិតណា។ អ្នកទិញជាច្រើនកំពុងបង្ហាញការព្រួយបារម្ភ និងសាកសួរអំពីភាពត្រឹមត្រូវនៃពេជ្រដែលពួកគេបានទិញ។ The Straits Times បានពិពណ៌នាថា ប្រតិកម្មរបស់អ្នកទិញគឺជា«ការភ្ញាក់ផ្អើល»យ៉ាងខ្លាំង។ គេក៏រំពឹងថា វិបត្តិទំនុកចិត្តនេះនឹងជះឥទ្ធិពលដល់ទីផ្សារត្បូងវៀតណាមក្នុងរយៈពេលវែង។