តាមការរាយការណ៍របស់ BBC, France 24 និង Dawn បំណែកនៃផ្នែកខាងលើនៃរ៉ុក្កែត Falcon 9 នេះ ត្រូវបានគេរំពឹងថាបានបុកចូលព្រះច័ន្ទកាលពីវេលាម៉ោងប្រមាណ ០៦:៣៥ ម៉ោង GMT នាថ្ងៃទី ៥ ខែសីហា ដោយមិនទាន់មានការបញ្ជាក់ជាផ្លូវការនៅឡើយ។ យោងតាម Dawn ការបុកនេះបានកើតឡើងនៅតំបន់ Einstein Crater លើផ្នែកខាងលិចនៃព្រះច័ន្ទ ក្នុងល្បឿន ៥.៤០០ ម៉ាយក្នុងមួយម៉ោង និងបានបន្សល់ទុកនូវរណ្តៅថ្មីមួយ។ Anadolu Agency បានរាយការណ៍ថា ថាមពលនៃការប៉ះទង្គិចស្មើនឹងគ្រឿងផ្ទុះ TNT ប្រមាណ ៣ តោន តែមិនបានបង្កគ្រោះថ្នាក់ដល់ផែនដីឡើយ។

បំណែកនេះ ដើមឡើយជាផ្នែកទីពីរនៃរ៉ុក្កែត Falcon 9 ដែលបានបាញ់ឡើងនៅខែមករា ឆ្នាំ ២០២៥ ដើម្បីបញ្ជូនយានចុះចតព្រះច័ន្ទរបស់ Firefly Aerospace។ ជាធម្មតា វាត្រូវធ្លាក់ចូលបរិយាកាសផែនដីវិញ ប៉ុន្តែដោយសារតម្រូវការថាមពលខ្ពស់សម្រាប់បេសកកម្មនេះ វាបានបន្តអណ្តែតក្នុងលំហអស់រយៈពេលជាងមួយឆ្នាំ។ តាម BBC អ្នកវិទ្យាសាស្ត្រដែលសិក្សាអំពីភព ចាត់ទុកការបុកនេះជា "អំណោយវិទ្យាសាស្ត្រ" ព្រោះវាអាចបង្ហាញទិន្នន័យសំខាន់ៗអំពីសមាសភាពព្រះច័ន្ទ និងជួយដល់បេសកកម្មអវកាសនាពេលអនាគត។ លោក Julianna Scheiman នាយកកម្មវិធី NASA និង Dragon របស់ SpaceX បានពន្យល់ថា សកម្មភាពព្រះអាទិត្យ និងកម្លាំងទំនាញ បានធ្វើឱ្យបំណែកនេះប្តូរគន្លងទៅបុកព្រះច័ន្ទ។ លោក Bill Gray តារាវិទូដែលបានចេញរបាយការណ៍កាលពីខែមេសា បាននិយាយថា ការបុកនេះអាចជាប្រធានបទសិក្សាតូចតាច ប៉ុន្តែក៏ជាការចង្អុលបង្ហាញពីការធ្វេសប្រហែសក្នុងការគ្រប់គ្រងកម្ទេចអវកាសផងដែរ។

ព្រឹត្តិការណ៍នេះ មិនមែនជាការបុកលើកដំបូងឡើយ។ តាម Dawn បំណែករ៉ុក្កែតចិនធ្លាប់បុកព្រះច័ន្ទកាលពីខែមីនា ឆ្នាំ ២០២២ ហើយ NASA បានបុកបំណែករ៉ុក្កែតជាច្រើនលើកដោយចេតនាក្នុងទសវត្សរ៍ឆ្នាំ ១៩៧០ ដើម្បីសិក្សារញ្ជួយដីព្រះច័ន្ទ។ យានអវកាសដូចជា Luna-25 របស់រុស្ស៊ី និង Chandrayaan-2 របស់ឥណ្ឌា ធ្លាប់ធ្លាក់នៅពេលប៉ុនប៉ងចុះចត ហើយយាន Beresheet របស់អ៊ីស្រាអែលដែលធ្លាក់ក្នុងឆ្នាំ ២០១៩ ក៏មានផ្ទុកសារពាង្គកាយមីក្រូទស្សន៍ "tardigrades" ផងដែរ។ NASA និង SpaceX កំពុងពិភាក្សាពីវិធីទប់ស្កាត់ការបុកបែបនេះនាពេលអនាគត ជាពិសេសនៅពេលដែល NASA មានគម្រោងសាងសង់មូលដ្ឋានព្រះច័ន្ទក្នុងក្របខ័ណ្ឌកម្មវិធី Artemis។

ក្រៅពីនេះ តាម CNBC អ្នកវិភាគហិរញ្ញវត្ថុខ្លះបានប្រដូចការធ្លាក់នេះទៅនឹងស្ថានភាពតម្លៃភាគហ៊ុនរបស់ SpaceX ដែលកំពុងជួបការលំបាក ហើយមើលឃើញថាវាជានិមិត្តរូបនៃការធ្លាក់ចុះរបស់ក្រុមហ៊ុន។