អង្គការលីកាដូបានចេញផ្សាយរូបភាពផ្កាយរណបដែលបង្ហាញថា កងកម្លាំងយោធាថៃបានឈូសបំផ្លាញផ្ទះសម្បែងរបស់ប្រជាពលរដ្ឋខ្មែរយ៉ាងហោចណាស់ ៦២៧ ខ្នង និងហេដ្ឋារចនាសម្ព័ន្ធស៊ីវិលជាច្រើនផ្សេងទៀត នៅក្នុងភូមិព្រៃចាន់ ជោគជ័យ និងបឹងត្រកួន ក្នុងខេត្តបន្ទាយមានជ័យ បន្ទាប់ពីការប្រកាសបទឈប់បាញ់រវាងកម្ពុជា និងថៃ កាលពីខែធ្នូ ឆ្នាំ២០២៥។ នេះបើយោងតាមសេចក្តីរាយការណ៍របស់សារព័ត៌មាន Phnom Penh Post និង RFI ដែលបានដកស្រង់ចេញពីសេចក្តីប្រកាសព័ត៌មានរបស់អង្គការលីកាដូ នៅថ្ងៃទី ៥ សីហា ឆ្នាំ២០២៦។

តាមការរាយការណ៍របស់កាសែតភ្នំពេញប៉ុស្តិ៍ លីកាដូបានធ្វើការប្រៀបធៀបរូបភាពផ្កាយរណបពីទីភ្នាក់ងារអវកាសអឺរ៉ុប (European Space Agency’s Sentinel-2) ដែលថតនៅខែមករា និងខែមីនា ឆ្នាំ២០២៦ ហើយរកឃើញថា ផ្ទះសម្បែងរាប់រយខ្នងបានបាត់បង់ក្នុងរយៈពេល ២ ខែ។ អង្គការនេះក៏បានលើកឡើងថា កងកម្លាំងយោធាថៃបានឈូសឆាយផ្ទះសម្បែងទាំងនេះភ្លាមៗក្រោយពេលដែលកិច្ចព្រមព្រៀងឈប់បាញ់ចូលជាធរមាន។

លីកាដូបានថ្លែងនៅក្នុងសេចក្តីប្រកាសថា៖ «កងកម្លាំងយោធាថៃបានឈូសឆាយផ្ទះសម្បែង និងហេដ្ឋារចនាសម្ព័ន្ធស៊ីវិល ភ្លាមៗក្រោយពេលដែលមានកិច្ចព្រមព្រៀងឈប់បាញ់រវាងប្រទេសកម្ពុជា និងថៃ។ ការព្រួយបារម្ភទាំងនោះ ត្រូវបានលើកឡើង ដោយផ្អែកលើរូបភាពផ្កាយរណបពីទីភ្នាក់ងារអវកាសអឺរ៉ុប» នេះបើយោងតាមការដកស្រង់របស់ភ្នំពេញប៉ុស្តិ៍។

ជាងនេះទៀត ភ្នំពេញប៉ុស្តិ៍បានរាយការណ៍ទៀតថា ការធ្វើបច្ចុប្បន្នភាពផែនទីរបស់ក្រុមហ៊ុន Apple ក៏បានបញ្ជាក់ពីការបំផ្លិចបំផ្លាញនេះដែរ។ លីកាដូបានបញ្ជាក់ថា៖ «ការធ្វើបច្ចុប្បន្នភាពរបស់ផែនទីក្រុមហ៊ុនអេបផល បានបង្ហាញឱ្យឃើញកាន់តែច្បាស់អំពី ផ្ទះសម្បែងរាប់រយខ្នង និងហេដ្ឋារចនាសម្ព័ន្ធស៊ីវិលជាច្រើនទៀត ត្រូវបានឈូសបំផ្លាញក្នុងរយៈពេលជាច្រើនខែមកនេះ នៅក្នុងតំបន់មួយចំនួននៃភូមិទាំងបីនេះ ដែលកំពុងគ្រប់គ្រងដោយភាគីថៃ រាប់ចាប់តាំងពីកិច្ចព្រមព្រៀងឈប់បាញ់ត្រូវបានអនុវត្តមក»។

រីឯវិទ្យុបារាំងអន្តរជាតិ RFI បានដកស្រង់សម្តីអ្នកតាមដានសង្គមដែលយល់ឃើញថា រូបភាពទាំងនេះនឹងក្លាយជាឯកសាររឹងមាំ ដែលបញ្ជាក់ពីអំពើឧក្រិដ្ឋរបស់កងទ័ពថៃមកលើពលរដ្ឋកម្ពុជា។