តាមការរាយការណ៍របស់ Phnom Penh Post លោក Guo Jiakun អ្នកនាំពាក្យក្រសួងការបរទេសចិន បានថ្លែងកាលពីថ្ងៃទី ១២ ខែសីហា ថា ទីក្រុងប៉េកាំងរក្សាកិច្ចសហប្រតិបត្តិការការពារជាតិជាប្រក្រតីជាមួយទាំងកម្ពុជា និងថៃ ហើយបានរក្សាការប្រាស្រ័យទាក់ទងដោយត្រង់ទៅត្រង់មកជាមួយប្រទេសទាំងពីរលើបញ្ហានេះ។ លោកបានបន្ថែមថា ចិននឹងបន្តដើរតួនាទីស្ថាបនាក្នុងការជួយសម្របសម្រួលឱ្យមានដំណោះស្រាយដោយសន្តិវិធីចំពោះវិវាទព្រំដែនកម្ពុជា-ថៃ។

RFI រាយការណ៍ថា ការបញ្ជាក់ជំហរជាថ្មីរបស់ចិននេះ ធ្វើឡើងនៅអំឡុងពេលដែលកម្ពុជាទើបតែទទួលសម្ភារយោធាមួយចំនួន ដូចជា រថគ្រោះ និងនាវាល្បាត ដែលជាកាដូរបស់រដ្ឋាភិបាលទីក្រុងប៉េកាំង។

តាមការរាយការណ៍របស់ Phnom Penh Post លោកឧត្តមនាវីត្រី Parach Rattanachaipan អ្នកនាំពាក្យកងទ័ពជើងទឹកថៃ បានប្រាប់សន្និសីទសារព័ត៌មានថា កងទ័ពជើងទឹកថៃមិនមានការព្រួយបារម្ភខ្លាំងចំពោះការពង្រីកសមត្ថភាពកងទ័ពជើងទឹករបស់កម្ពុជានោះទេ ប៉ុន្តែថៃនឹងត្រូវវាយតម្លៃឡើងវិញអំពីបរិយាកាសសន្តិសុខក្នុងតំបន់ ខណៈកងនាវាកម្ពុជាកំពុងផ្លាស់ប្តូរពីនាវាល្បាតចាស់ៗ ទៅជានាវាចម្បាំងដែលមានទំហំធំ និងសមត្ថភាពខ្ពស់ជាងមុន។

Phnom Penh Post បានរាយការណ៍បន្ថែមថា ការលើកឡើងនេះធ្វើឡើងបន្ទាប់ពីមានសេចក្តីរាយការណ៍ថា កងទ័ពជើងទឹកកម្ពុជាបានធ្វើសមយុទ្ធនៅតំបន់ព្រះសីហនុ ដោយមានការចូលរួមពីនាវាចម្បាំងប្រភេទ Corvette លេខ ៦២២ ដែលផ្គត់ផ្គង់ដោយចិន។ លោក Parach បានទទួលស្គាល់ថា ការធ្វើសមយុទ្ធបន្ទាប់ពីទទួលបានសម្ភារយោធាថ្មី គឺជារឿងធម្មតា ព្រោះកងនាវិកត្រូវហ្វឹកហាត់ និងស្គាល់ពីរបៀបប្រតិបត្តិការនាវាទាំងនោះ។ ទោះជាយ៉ាងណា តាមការរាយការណ៍ដដែល ការដាក់ពង្រាយនាវា Corvette ចំនួនពីរគ្រឿងនេះ អាចបង្កើនភាពតានតឹងនៅក្នុងដែនទឹកក្នុងតំបន់ ជាពិសេសនៅតំបន់ភាគខាងជើងនៃឈូងសមុទ្រថៃ នេះបើយោងតាមក្តីកង្វល់របស់កងទ័ពជើងទឹកថៃ។