កាលពីថ្ងៃទី ២៧ សីហា ក្រុមហ៊ុនបញ្ញាសិប្បនិម្មិត Anthropic បានប្រកាសដាក់ចេញស្តង់ដារកម្មវិធីថ្មីមួយ ដែលមានឈ្មោះថា Model Hardware Standard ដើម្បីជួយឲ្យភ្នាក់ងារបញ្ញាសិប្បនិម្មិត ឬ AI agents អាចដំណើរការម៉ាស៊ីន និងឧបករណ៍នានា ហើយអាចគ្រប់គ្រងពិភពរូបវន្តបាន នេះបើតាមការរាយការណ៍របស់ Ars Technica និង CNBC។

តាមការរាយការណ៍របស់ Ars Technica ស្តង់ដារថ្មីនេះជាចំណុចប្រទាក់ driver ដែលមានលក្ខណៈស្តង់ដារ ដោយមានគោលបំណងឲ្យឧបករណ៍ផ្សេងៗអាចទំនាក់ទំនងជាមួយប្រព័ន្ធ AI និងជាមួយឧបករណ៍ឯទៀតគ្នាឯងបាន។

កាសែត The Japan Times បានរាយការណ៍ថា ស្តង់ដារកម្មវិធីថ្មីនេះ ជាសំខាន់ផ្ទុកព័ត៌មានសម្រាប់ឲ្យប្រព័ន្ធជំនួយបញ្ញាសិប្បនិម្មិតអាចយល់ដឹងអំពីរបៀបដែលឧបករណ៍នីមួយៗដំណើរការ។ កាសែតដដែលក៏បានរាយការណ៍ផងដែរថា ក្រុមហ៊ុន Anthropic កំពុងសាកល្បងវិធីសាស្ត្រថ្មីនេះ ដើម្បីឲ្យប្រព័ន្ធ AI របស់ខ្លួនដែលមានឈ្មោះថា Claude អាចធ្វើការរួមគ្នាជាមួយមនុស្សយន្ត (robots) និងឧបករណ៍មន្ទីរពិសោធន៍វិទ្យាសាស្ត្របាន។

ចំណែក CNBC បានរាយការណ៍ថា ស្តង់ដារ Model Hardware Standard ត្រូវបានដាក់ឲ្យប្រើប្រាស់ជាដំបូងក្នុងទម្រង់សាកល្បងស្រាវជ្រាវ (research preview) ហើយក្រុមហ៊ុន Anthropic មានគម្រោងបើកចំហកូដរបស់ខ្លួនជាសាធារណៈ (open source) នាពេលអនាគត។ បើតាម CNBC ការប្រកាសនេះជាការបោះជំហានថ្មីរបស់ Anthropic ចូលទៅក្នុងពិភពរូបវន្ត ដើម្បីជួយឲ្យ AI agents អាចដំណើរការម៉ាស៊ីនបាន។