ប៉ូលិសអូទ្រីសកំពុងតាមប្រមាញ់បុរសពីរនាក់ ដែលត្រូវបានចោទប្រកាន់ថាបានលួចខ្សែកផ្លាទីនទម្ងន់ ២០០ ការ៉ាត់ ប្រដាប់ដោយត្បូងពេជ្រ ៦៧៣ គ្រាប់ ពីសារមន្ទីរសិល្បៈអនុវត្ត ដែលគេហៅកាត់ថា MAK ក្នុងរដ្ឋធានីវីយែន ប្រទេសអូទ្រីស។ តាមការរាយការណ៍របស់កាសែត The Guardian អំពើលួចនេះបានកើតឡើងក្នុងអំឡុងម៉ោងបើកទ្វាររបស់សារមន្ទីរ ហើយអាជ្ញាធរបានចេញផ្សាយរូបភាពជនសង្ស័យទាំងពីរនាក់ ដែលថតបានដោយកាមេរ៉ាសុវត្ថិភាពក្នុងពេលកើតហេតុ។

កាសែត The Guardian បានរាយការណ៍បន្ថែមថា ខ្សែកដែលត្រូវបានគេលួចនេះ ត្រូវបានគេយកទៅដាក់តាំងបង្ហាញបណ្តោះអាសន្ននៅសារមន្ទីរ MAK ហើយធ្លាប់ជាកម្មសិទ្ធិរបស់ព្រះមហាក្សត្រិយានីអេហ្ស៊ីប ដែលធ្វើឲ្យខ្សែកនេះត្រូវបានចាត់ទុកជាវត្ថុប្រវត្តិសាស្ត្រ។ កាសែត The Straits Times បានរាយការណ៍ដោយឡែកថា ខ្សែកពេជ្រខាងលើនេះមានតម្លៃប្រមាណ ៥,១ លានដុល្លារ។

ដោយឡែក កាសែត Asharq Al-Awsat រាយការណ៍ថា ជនសង្ស័យទាំងពីរនាក់បានទិញសំបុត្រចូលទស្សនាសារមន្ទីរក្នុងទីក្រុងវីយែនជាមុនសិន មុនពេលធ្វើសកម្មភាពលួចយកខ្សែកពេជ្រនោះចេញទៅ។ មកទល់ពេលនេះ គ្មានប្រភពរាយការណ៍ណាមួយបានបញ្ជាក់ថា ជនសង្ស័យទាំងពីរនាក់ត្រូវបានឃាត់ខ្លួននៅឡើយទេ។

កាសែត The Straits Times បានរាយការណ៍បន្ថែមទៀតថា អំពើលួចមួយនេះ នឹងធ្វើឲ្យមានការយកចិត្តទុកដាក់ជាថ្មី មកលើពិធីការសន្តិសុខនៅតាមសារមន្ទីរនានា។ កាសែត The Guardian ក៏បានរាយការណ៍ផងដែរថា អំពើលួចនៅសារមន្ទីរ MAK នេះ មិនមែនជាករណីដាច់ដោយឡែកនោះទេ ដោយស្ថាប័នវប្បធម៌នានានៅទ្វីបអឺរ៉ុប បាននិងកំពុងជួបប្រទះរលកនៃអំពើលួចបែប «វាយបំបែកហើយរត់គេច» ជាបន្តបន្ទាប់។